Փաստ ինֆո

Աղվան Հովսեփյանի գործով քաղաքական իշխանությունը նույնպես ունի որոշակի հետաքրքրություն։ Որոշակի պաշտոնատար անձինք, ինչու ոչ, որոնք զբաղեցնում են պաշտոններ ԲԴԽ-ում, Հակակոռուպցիոն կոմիտեում, այո, հետաքրքրված են Աղվան Հովսեփյանի նկատմամբ իրականացվող քրեական հետապնդմամբ։ Այս մասին «Փաստինֆո»-ի եթերում ասաց ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի պաշտպան Էրիկ Ալեքսանյանը։

Պաշտպանը հիշեցրեց, որ քրեական գործը հարուցվել է 2020թ մարտի 31-ին և քրեական գործ հարուցելու մասին որոշումն ուսումնասիրելու դեպքում տեսնում ենք, որ տրված են այնպիսի ձևակերպումներ, որոնք ուղղակիորեն վերաբերում են Աղվան Հովսեփյանին։

«Հարց է առաջանում՝ եթե այդ փաստական տվյալները պարունակում էին հանցագործության մասին հատկանիշներ, բավարար էին անձի նկատմամբ քրեական հետապնդում իրականացնելու համար, ապա 2020թ մարտին Աղվան Հովսեփյանի նկատմամբ քրեական հետապնդում ինչու չիրականացվեց։ Աղվան Հովսեփյանի նկատմամբ քրեական հետապնդում իրականացվեց 2021թ,երբ իրականացվում էր նախընտրական քարոզչություն և Աղվան Հովսեփյանն Ապարան քաղաքում որոշակի դիրքորոշում հայտնեց «Հայաստան« դաշինքի օգտին, սկսվեց այս քաղաքական խայտառակ հետապնդումը »,- նշեց Ալեքսանյանը՝ հավելելով, որ Աղվան Հովսեփյանը քաղաքականության հետ որևէ կապ չունի, մարդն ամբողջ կյանքում զբաղեցրել է իրավապահ համակարգերի ղեկավարի պաշտոնը, սակայն որպես քաղաքացի որոշակի դիրքորոշում հայտնելուց հետո, քաղաքացիական պարտքի դրսևորումից հետո սկսվել է այս քաղաքական հետապնդումը։

Հարցին ի պատասխան, թե ինչը դուր չեկավ քաղաքական իշխանությանը, կոնկրետ Նիկոլ Փաշինյանին՝ Ալեքսանյանը հիշեցրեց Աղվան Հովսեփյանի դիրքորոշում, կարծիքն առ այն, որ վերջինս տեսնում է Ռոբերտ Քոչարյանին՝ որպես այն անձի, որը կարող է այս անելանելի վիճակից դուրս հանելու, ինչը, բնականաբար, չի կարող դուր գալ Նիկոլ Փաշինյանին և քաղաքական իշխանության մյուս ներկայացուցիչներին։

«Այդ դուր չգալուն հաջորդում է այս ապօրինի քրեական հետապնդումը, ընդհուպ՝ մինչև կալանավորումը»,- նշեց Ալեքսանյանը։

Փաստաբանը էական է համարում նաև Աղվան Հովսեփյանի դիրքորոշումը՝ հայ դատի վերաբերյալ, որն Աղվան Հովսեփյանը ներկայացրել է դեռևս 2013թ։

«Այնքանով է էական, որ մեր այսօրվա քաղաքական իշխանությունն այս հարցի համատեքստում կարծես թե ունի մի փոքր այնպիսի դիրքորոշում, որն առհասարակ չի բխում հայ ազգի շահերից, հետևաբար, պարոն Հովսեփյանի իրավական դիրքորոշումը չի կարող նրանց համար լինել դուրեկան, հակասում է նաև նրանց դիրքորոշմանը»,- նշեց Ալեքսանյանը՝ հավելելով, որ քաղաքական իշխանության նպատակն էլ հենց մարդկանց մեկուսացնելն է, կալանքի տակ պահելն է, որ չխոսեն։

Դիտարկմանը, որ գործող գլխավոր դատախազ Արթուր Դավթյանն իր մասնագիտական առաջխաղացումն ունեցել է Աղվան Հովսեփյանի պաշտոնավարման տարիներին, Հակակոռուպցիոն կոմիտեի ներկայիս նախագահը նախկինում փորձել է աշխատանքի անցնել ՔԿ-ում, սակայն Հովսեփյանն աշխատանքի չի ընդունել և վերջապես Գագիկ Ջհանգիրյանը գլխավոր դատախազի տեղակալի պաշտոնից ազատվել է՝ քաղաքական գործունեությամբ զբաղվելու համար, հնարավո՞ր է, որ անձնական վրեժխնդրություն լինել՝ Ալեքսանյանն արձագանքեց. «Ոչ միայն կարող է, այլ՝ հենց այդպես էլ կա։ Մենք ի սկզբանե այս մեղադրանքները որակում էինք ոչ միայն քաղաքական դրդապատճառներ ունեցող, այլև՝ անձնական վրեժխնդրության արդյունք է»։

Ալեքսանյանի դիտարկմամբ՝ Արթուր Դավթյանն իր մասնագիտական վերելքն ունեցել և ձեռք է բերել նաև Աղվան Հովսեփյանի շնորհիվ, ինչի մասին ոչ ոք չպետք է մոռանա, իսկ ինչ վերաբերում է մեղադրանքի պաշտպանությունը դատախազության կողմից, ապա, ըստ նրա, Արթուր Դավթյանի գործելաոճն ուղղված է նրան, որ վերջինս գոնե մի փոքր երկարացնի իր կյանքը, որովհետև, ըստ ասեկոսեների, սեպտեմբեր ամսին Դավթյանի ղեկավարման ժամկետը լրանալու։ Ալեքսանյանը հակված է կարծելու, որ Աղվան Հովսեփյանի գործն այն գործերից մեկն է, որով Արթուր Դավթյանը փորձում է ամրապնդել իր տեղը և մի փոքր երկարացնել իր կյանքը, ինչը, մեղմ ասած, արժանի պահվածք և գործելաոճ չէ։ Ինչ վերաբերում է Ջհանգիրյանին, փաստաբանը վերահաստատեց, որ Ջհանգիրյանն ազատվել է պաշտոնից՝ քաղաքական գործունեությամբ զբաղվելու պատճառով, որովհետև դատախազն ի պաշտոնե չի կարող զբաղվել քաղաքականությամբ, իսկ պաշտոնից ազատվելուց հետո ենթարկվել է քրեական հետապնդման, հետևաբար, նման պայմաններում արդյո՞ք Գագիկ Ջհանգիրյանը չէր լցվի ատելությամբ, վրեժխնդրությամբ՝ Աղվան Հովսեփյանի նկատմամբ, ում պաշտոնավարման տարիներին ազատվել է պաշտոնից՝ իրավացիորեն։

Անդրադառնալով Սասուն Խաչատրյանի գործոնին՝ Ալեքսանյանը նշեց, որ Սասուն Խաչատրյանն Աղվան Հովսեփյանի հրամանով նշանակվել է Երևան քաղաքի դատախազի տեղակալ, որոշ ժամանակ անց, երբ Աղվան Հովսեփյանը ՔԿ նախագահն էր, Խաչատրյանը չի ընդունվել ՔԿ-ում՝ հենց Աղվան Հովսեփյանի նախաձեռնությամբ, որովհետև չի համապատասխանել չափանիշներին։

«Պատմությունը ցույց է տալիս, որ մեր ազգը շատ նեղացկոտ ազգ է։ Գուցե՝ վրեժխնդիր։ Տեսնում ենք, որ Սասուն Խաչատրյանի պարագայում ևս ամբիցիաները մնացել են, պահպանվել են և այս մեղադրանքները կապված են այդ անձանց ամբիցիաների վրա»,- եզրափակեց Ալեքսանյանը։

Մանրամասները՝ տեսանյութում

Աղբյուր` Փաստինֆո