Փաստ ինֆո

Ռուսաստանի պաշտպանության նախարարությունը հրապարակել է Ուկրաինայի ազգային գվարդիայի հրամանատարի գաղտնի հրամանի բնօրինակը՝ 2022թ․ մարտին Դոնբասի վրա հարձակվելու մասին։ Այդ մասին, ինչպես հաղորդում են ռուսական աղբյուրները, լրագրողներին հայտնել է ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը։

«Ռուսաստանի պաշտպանության նախարարությունը հրապարակում է 2022թ․ հունվարի 22-ից Ուկրաինայի ազգային գվարդիայի հրամանատար, գեներալ-գնդապետ Նիկոլայ Բալանի գաղտնի հրամանի բնօրինակը։ «Ուկրաինայի զինված ուժերի բրիգադի կազմում միացյալ ուժերի ռազմական (հատուկ) առաջադրանքի կատարման նպատակով 4-րդ բրիգադի օպերատիվ նշանակության գումարտակային տակտիկական խմբի  նախապատրաստման  կազմակերպման մասին» հրամանը հասցեագրված է Ուկրաինայի ազգային գվարդիայի հյուսիսկիևյան, հարավօդեսական և արևմտյան տարածքային կառավարման ղեկավարներին»,-նշել է Կոնաշենկովը։

Գեներալ-մայորն ընդգծել է, որ փաստաթղթում բացակայում են առաջադրանքների կատարման համար պատասխանատու, Ուկրաինայի ազգային գվարդիայի  հրամանատարության ներկայացուցիչ հանդիսացող պաշտոնատար անձանց ստորագրությունների բնօրինակները։

Կոնաշենկովը նաև հայտնել է, որ համաձայն հրամանի՝ ազգային գվարդիայի հրամանատարի տեղակալին հանձնարարված էր փետրվարի 7 -28-ն Ուկրաինայի զինված ուժերի 80-րդ առանձին դեսանտագրոհային բրիգադի կազմում կազմակերպել ազգային գվարդիայի գումարտակային-տակտիկական խմբի ռազմական պատրաստություն։

«Ուշագրավ է այն, որ 4 կետի 5 պարբերություն ամբողջությամբ  վերաբերում է անձնակազմի մանրամասն ընտրությանը, հոգեբանների մոտ մանրազննին հետազոտվելուն և նրանց մոտ բարձր մոտիվացիա ապահովելուն։ Դրա համար գվարդիականներին կարգադրված է ապահովել տեսանելի քարոզչությամբ, տեղեկատվական-քարոզչական նյութերով, դրոշներով և տպագրական նյութերով»,-մանրամասնել է Կոնաշենկովը։

Նա նաև ընդգծել է, որ համաձայն հրամանի՝ «ազգայնականների ռազմական կարգավորումներին վերաբերող բոլոր միջոցառումները պետք է ավարտին հասցվեն մինչև փետրվարի 28-ը, որպեսզի Դոնբասում  ուկրաինական «միացյալ ուժերի» կազմում հետագայում ապահովեն ռազմական առաջադրանքների կատարումը»։

Աղբյուր` Փաստինֆո