Փաստ ինֆո

Ադրբեջանական կողմը փորձում է ճնշում բանեցնել հայ հասարակության վրա և հարկադրել հայ հանրույթին, որպեսզի չընդդիմանա Հայաստանի կապիտուլյանտական ռեժիմի կողմից նախատեսվող պրոթուրքական պայմանագրերի կնքմանը: «Փաստինֆո»-ի հետ զրույցում նման դիտարկում է արել ռազմական փորձագետ Դավիթ Ջամալյանը՝ մեկնաբանելով վերջին շրջանում Ադրբեջանի կողմից սադրանքների պարբերականության ակտիվացմանը։ պատճառները:

Նշենք, որ Ադրբեջանը վերջերս ակնհայտ սադրիչ գործողությունների է դիմում թե Հայաստանի և թե Արցախի հատվածում: Ավելին՝ Երասխի հատվածում այսօր ունենք նաեւ մեկ զոհ ու վիրավոր։

Ըստ ռազմական փորձագետ Դավիթ Ջամալյանի՝ այսկերպ թշնամին փորձում է ճնշումներ բանեցնել հայ հասարակության վրա և պարտադրել, որպեսզի հայ ժողովուրդը համակերպվի ամեն ինչ զիջելու գնով խաղաղության հասնելու հեռանկարին, որն առաջ է տանում ՀՀ իշխանությունը։

«Խաղաղության դարաշրջան ասվածը, որը Հայաստանի գործող իշխանությունն է մեկնարկել, ըստ էության, նշանակում է հագուրդ տալ թուրք-ադրբեջանական տանդեմի ծավալապաշտական նկրտումներին, այս պրոցեսին հայ հանրույթի զգալի մասն ընդդիմանում է, որպեսզի հասարակությունն այլևս չխանգարի Հայաստանի կապիտուլյանտական իշխանությանը, որպեսզի զիջումների գնա, ադրբեջանական կողմն այդպիսի քայլերի է դիմում»,-ասաց Ջամալյանը՝ միևնույն ժամանակ նկատելով, որ թշնամին փորձում է առավելագույնը կորզել Հայաստանի գործող իշխանություններից.

«Բաքվում հասկանում են, եթե հիմա չկորզեն, վաղն արդեն ուշ է լինելու »,-ասաց Ջամալյանը՝ ընդգծելով, որ Արցախում թշնամին սովորաբար ավելի կոշտ արձագանք է ստանում, այդ իսկ պատճառով այնտեղ համեմատաբար ավելի զուսպ է:

Փորձագետի արձանագրմամբ՝ Արցախի իշխանությունները, ռուս խաղաղապահների հետ միասին, ադրբեջանական սադրանքներին օպերատիվ պատասխանում են, իսկ Հայաստանում իշխանությունն այս առումով ոչինչ չի անում.

«Թշնամին փորձում էր հոգեբանական ճնշում գործադրել Արցախում, սակայն անմիջապես հետո ստացավ կտրուկ արձագանք, Արցախի իշխանությունների և ռուս խաղաղապահների ջանքերով այդ ամենի դեմն առնվեց: Խրամորթ գյուղը ոչ միայն չդատարկվեց, այլ նաև Ադրբեջանի այդ քայլը հավուր պատշաճի պատասխան ստացավ, բայց քանի որ այստեղ դրության տերը Հայաստանի կապիտուլյանտական ռեժիմն է, ապա ադրբեջանական կողմի ձեռքերն ավելի ազատ են, կանխող ռուսական գործոնը այդքան ընդգծված չէ: Հայաստանի իշխանությունները խուսափում են արձագանքել ադրբեջանական սադրանքներին, քանի որ հայ հասարակության վրա Ադրբեջանի կողմից ճնշումը ձեռնտու է կապիտուլյանտական ռեժիմին, իրենք պետք է հիմնվեն այդ ճնշումների վրա, որպեսզի գնան զիջումների»,-ասաց փորձագետը:

Դավիթ Ջամալյանի արձանագրմամբ՝ Ադրբեջանը նաև օգտվում է առիթից, որ Ռուսաստանն իր ամբողջ ուշադրությունը սևեռել է Ուկրաինայի վրա և այստեղ ավելի ազատ և ագրեսիվ քայլերի է դիմում՝ կարծելով, որ Ռուսաստանը չի միջամտի.

«Իրենք այստեղ մի վրիպում են թույլ տալիս՝ փոքր միջադեպերի դեպքում Ռուսաստանը, այո, չի արձագանքի, բայց եթե թուրք-ադրբեջանական տանդեմը լուրջ ագրեսիվ քայլերի դիմի, ապա ռուսական կողմի արձագանքը կտրուկ կլինի, պարզապես Ռուսաստանին ձեռնտու չէ երկրորդ զուգահեռ լարվածության օջախը։

Ադրբեջանում հասկանում են, որ Ռուսաստանի հաջորդ քայլը լինելու է Հայաստանում վերացնել այն աննորմալ իրավիճակը, որը ստեղծվել է ՀՀ գործող իշխանությունների մեղքով: Այս աննորմալ իրավիճակը սպառնում է ոչ միայն Հայոց պետականությանը, այլ նաև Ռուսաստանի կենսական շահերին, Հարավային Կովկասը հիմա վերածվել է Ռուսաստանին հարվածելու պլացդարմի, դա արվել է թուրք-ադրբեջանական տանդեմի միջոցով, որի թիկունքին կանգնած է բրիտանական վերնախավը»,-ասաց Դավիթ Ջամալյանը:

Աղբյուր` Փաստինֆո