Փաստ ինֆո

«Ադրբեջանի պաշտպանության նախարարի հայտարարությունը ո՛չ ավել, ո՛չ պակաս ուղիղ հրահանգ է՝ ռազմական գործողություններ սկսելու համար։ Ի՞նչ է նշանակում համարժեք պատասխան տալ սադրանքներն, երբ չգիտենք, թե ո՞ր կողմն է իրականում հրահրել դրանք։ Ստացվում է, որ սա, թեկուզ տեղային, բայց և այնպես ռազմական գործողություն սկսելու համար վառված կանաչ լույս է»,- «Փաստինֆո»-ի հետ զրույցում ասում ռազմական փորձագետ Կարեն Հովհաննիսյանը՝ մեկնաբանելով Ադրբեջանի Պաշտպանության նախարարի այսօր արձակած հրամանը։

Տեղեկացնենք, որ վերջին օրերին ադրբեջանցիները պարբերաբար սադրանքների են դիմում թե Հայաստանի, թե Արցախի շփման գծում, որի հետեւանքով այսօր Երասխում ունենք զոհ։ Մինչդեռ ադրբեջանցիները տարածելով ապատեղեկատվություն՝ նշում են, թե հայկական կողմն է խախտում հրադադարը ու minval.az-ի փոխանցմամբ՝ Ադրբեջանի պաշտպանության նախարարությունում տեղի ունեցած խորհրդակցության ժամանակ հանձնարարականներ են տրվել հայկական կողմի «հնարավոր սադրանքներին» անհապաղ համարժեք պատասխան տալու վերաբերյալ։

Ռազմական փորձագետը երեկ Խարկովում ադրբեջանական հյուպատոսարանի ռմբակոծման և այսօր Երասխում, Արցախի սահմաններին ադրբեջանական կողմի հրահրած ռազմական սադրանքների միջև որեւէ կապ չի տեսնում.«Իրականում ռուս- ուկրաինական հակամարտության ֆոնին այստեղ ակտիվացող ռազմական սադրանքների կապը շատ ավելի խորքային է, քան հյուպատոսարանի ռմբակոծման դրվագը, թեկուզ միայն այն պատճառով, որ մինչ այս պահը չկա որևէ հավաստի ինֆորմացիա, թե ո՞ր կողմն է իրականում ռմբակոծել այն»։

Խոսելով այսօր Հայաստանի և Արցախի սահմաններին իրավիճակի սրման մասին՝ ռազմական փորձագետ Կարեն Հովհաննիսյանը կարծիք է հայտնում՝ այն աստիճանաբար կմարի.«Սրա համար կարող է հիմք հանդիսանալ ռուս- ուկրաինական ռազմական գործողությունների մեկնարկի նախօրեին Ալիևի այցը՝ Մոսկվա, որտեղ նա 43 կետից բաղկացած ռազմական բնույթի համագործակցության դաշնագիր է ստորագրել Ռուսաստանի դաշնության հետ։ Կարծում եմ սրանով ՌԴ ղեկավարը նաև փորձ է արել կանխելու այս ընթացքում այստեղ՝ Հարավային Կովկասում բռնկվելիք ռազմական էսկալացիաների փորձերը, այդ թվում նաև՝ ՀՀ և Արցախի սահմաններին։ Հետևաբար` հակված չեմ կարծելու, թե գոնե այս փուլում Ադրբեջանը կամ թուրք ադրբեջանական տանդեմն այս տարածքում ռազմական ագրեսիա կբանեցնի։ Գոնե այս հուշագրով, Ալիևի ձեռքերը, կարելի է ասել, կապված են»։

Հարցին՝ կարո՞ղ էր արդյոք նախօրեին տեղի ունեցած Էրդողան – Պուտին հեռախոսազրույցն այստեղ՝ ՀՀ կամ Արցախի սահմաններին ռազմական ակտիվության կամ սադրանքների տեղիք տվող բովանդակություն պարունակել, ռազմական փորձագետ Կարեն Հովհանիսյանը քիչ հավանական է համարում։

Հիշեցնենք, որ այսօր կեսօրից Ադրբեջանի ԶՈՒ ստորաբաժանումները հերթական սադրանքի են դիմել՝ կրակ բացելով Արարատի մարզի Երասխ գյուղի ուղղությամբ, ինչի հետևանքով հրազենային վիրավորում է ստացել ՀՀ ԶՈՒ երկու զինծառայող։ Նրանցից մեկը, պայմանագրային զինծառայող, սերժանտ Հրաչ Արամի Մանասարյանը, հիվանդանոց տեղափոխվելու ճանապարհին մահացել է:

Միաժամանակ այսօր խաղաղ չեն եղել նաև Արցախի սահմանները։ Ադրբեջանական կողմը 60 մմ տրամաչափի ականանետով թիրախավորել է Խրամորթ գյուղին հարակից գերեզմանոցը։ Երեկ կրակել են Թաղավարդի, Խրամորթի ուղղությամբ, նախօրեին՝ Նորշենի։

Միջադեպի մասին հաղորդվել է ՌԴ խաղաղապահ զորակազմի հրամանատարությանը։

Աղբյուր` Փաստինֆո