Փաստ ինֆո

Գագիկ Ջհանգիրյանը չի մասնակցի Վարչական դատարանի դատավոր Դանիել Դանիելյանին կարգապահական պատասխանատվության ենթարկելու վերաբերյալ միջնորդության քննությանը։ 

«Փաստինֆո»-ի թղթակցի հաղորդմամբ՝ մինչ Խորհուրդը կանցներ միջնորդության բուն քննությանը՝ Վարչական դատարանի դատավոր Դանիել Դանիելյանի ներկայացուցիչ Արթուր Ղամբարյանը Գագիկ Ջհանգիրյանին բացարկ հայտնելու միջնորդություն ներկայացրեց, որ հիմքում դրվել է այն հանգամանքը, որ դատավոր Դանիելյանի վարույթում է քննվում Ջհանգիրյանի՝ որպես ԲԴԽ անդամ ընտրվելու հարցի իրավաչափությունը։ Հայցադիմումը ներկայացրել էր դատավոր Կարինե Պետրոսյանը՝ ընդդեմ ԲԴԽ նախագահ (լիազորությունները կասեցված են) Ռուբեն Վարդազարյանի։ Գործով որպես երրորդ անձ է ներգրավված Գագիկ Ջհանգիրյանը, որը նախնական դատական նիստի ընթացքում միջնորդել է կարճել վարույթը, սակայն դատարանը լռությամբ մերժել է այն՝ հաջորդ դատական նիստի օր նշանակելով։

Դատավորը պարզաբանեց, որ նշված միջնորդությանը պետք է անդրադառնա վերջնական դատական ակտը կայացնելիս։ Բացի այդ՝ դատավորն ուշադրություն հրավիրեց այն հանգամանքին, որ ՍԴ-ում Գագիկ Ջհանգիրյանի պաշտոնավարման իրավաչափության հարցով վարույթ կա և բացարկի միջնորդությունը չմերժելու դեպքում հնարավոր է հարց առաջանա՝ կարգապահական վարույթի քննության կասեցման մասին։

ՀՀ արդարադատության նորանշանակ փոխնախարար Գրիգորի Մինասյանն առարկություն ներկայացրեց՝ հայտարարելով. «Կարծես թե սովորություն է դարձել, որ բոլոր գործերով դատավորների ներկայացուցիչները բացարկ են հայտնում»։ Ըստ Մինասյանի՝ միջնորդությունն անհիմն է և ենթակա է մերժման։

Կողմերի դիրքորոշումը լսելուց հետո ԲԴԽ-ն խորհրդակցական սենյակում կայացրեց միջնորդությունը բավարարելու որոշում։

Հիշեցնենք, որ ՀՀ արդարադատության նախարարի կողմից «Լուսավոր Հայաստան» կուսակցության նախագահի հաղորդման հիման վրա նշված գործը քննած՝ կոլեգիալ դատական կազմում որպես նախագահող դատավոր ընդգրկված դատավոր Դանիել Դանիելյանի նկատմամբ հարուցվել է կարգապահական վարույթ այն պատճառաբանությամբ, որ նշված գործով վճիռը դատական նիստում բարձրաձայն ընթերցվել (հրապարակվել) է ոչ թե նախագահող դատավոր Դանիել Դանիելյանի կողմից, այլ կոլեգիալ դատական կազմում ընդգրկված մեկ այլ դատավորի կողմից: Այնուհետև, երբ դատավոր Դանիել Դանիելյանը 26.01.2022թ. ՀՀ արդարադատության նախարարին է ներկայացրել բացատրություն այն մասին, որ ՀՀ վարչական դատավարության օրենսգրքով միայն սահմանվել է, որ գործն, ըստ էության, լուծող դատական ակտը պետք է բարձրաձայն ընթերցվի (հրապարակվի) դատական նիստում, իսկ թե կոլեգիալ կազմում ընդգրկված կոնկրետ որ դատավորի կողմից պետք է ընթերցվի, օրենսգրքով չի սահմանվել, նաև այն հաշվառմամբ, որ դրանով անձի որևէ իրավունք չի կարող խախտվել, ՀՀ արդարադատության նախարարը հաջորդ իսկ օրը՝ 27.01.2022թ., կայացրել է որոշում դատավոր Դանիել Դանիելյանին կարգապական պատասխանատվության ենթարկելու վերաբերյալ միջնորդությամբ Բարձրագույն դատական խորհրդին դիմելու մասին:
Հեղինակ՝ Իզաբել Սահակյան

Աղբյուր` Փաստինֆո