Փաստ ինֆո

Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, մեղավոր է ճանաչել Վահան Բադասյանին և նրա նկատմամբ որպես պատիժ սահմանել տուգանքը՝ 300.000 ՀՀ դրամի չափով։ Պաշտպան Արայիկ Պապիկյանը «Փաստինֆո»-ի հետ զրույցում հայտնեց, որ դատարանի որոշման դեմ պատրաստվում են բողոք ներկայացնել։

Նշենք, որ գործով մեղադրող դատախազը նախորդ դատական նիստին մեղադրական ճառով էր հանդես եկել և միջնորդել մեղավոր ճանաչել Բադասյանին՝ ՀՀ քրեական օրենսգրքի 301-րդ հոդվածի հատկանիշներով և որպես պատիժ կիրառել տուգանքը՝ նվազագույն աշխատանքի հինգ հարյուրապատիկի չափով (500.000 ՀՀ դրամ)։ Հաշվի առնելով, որ Բադասյանը 13 օր կալանավորված է եղել՝ դատախազը նշել էր, թե պետք է մեղմացնել նշանակված պատիժը և 50 հազար դրամով նվազեցրել տուգանքի չափը՝ առաջարկելով 450.000 ՀՀ դրամը։ Որպես մեղմացնող հանգամանք է դիտարկվել նաև Բադասյանի անձը բնութագրող հատկանիշները, այդ թվում՝ վերջինիս մասնակցությունը Արցախյան պատերազմին և ծանր վիրավորում ստանալը։

Փաստաբան Արայիկ Պապիկյանը մեզ հետ զրույցում տեղեկացրեց, որ պաշտպանական ճառում ինքը միջնորդել էր արդարացնել Բադասյանին։

Հիշեցնենք, որ 2021թ հունվարի 28-ին ԱԱԾ-ն բերման է ենթարկել, ապա՝ ձերբակալել Վահան Բադասյանին՝ Եռաբլուր զինվորական պանթեոնում իր կողմից արված հայտարարությունների համար։ Վերջինս հայտարարել է, որ Նիկոլ Փաշինյանը կործանել է բանակը և նրան պետք է հեռացնեն ոչ միայն որպես պարտության խորհրդանիշ, այլև թշնամի․

«Հեռացնելու տարբեր ճանապարհներ կան ընդհուպ ֆիզիկապես հեռացնելը։ Դա ենթադրում է, որ թշնամուն պետք է վերացնենք, թեկուզ զենքի ուժով։ Այո, ես գիտակցաբար սպառնալիքի կոչեր եմ անում, թող ԱԱԾ-ն ձերբակալի ինձ։ Ցանկացած մեկը պետք է ցանկանա թշնամուն ոչնչացնել։ Դա անհատները պետք է անեն։ Ես ինքս պատրաստ եմ դրան»,-ասել է Վահան Բադասյանը։

Այս հայտարարություններից հետո հարուցվել է քրեական գործ, որի շրջանակներում նրան մեղադրանք է առաջադրվել ՀՀ քրեական օրենսգրքի 301-րդ հոդվածի հատկանիշներով՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերի համար։ Բադասյանն առաջադրված մեղադրանքը չի ընդունել։

ԱԱԾ քննիչը Վահան Բադասյանի նկատմամբ կալանավորումը որպես խափանման միջոց ընտրելու մասին միջնորդություն էր ներկայացրել դատարան, որը բավարարվել է։ Հետագայում դատախազի որոշմամբ Բադասյանի նկատմամբ ընտրված խափանման միջոց կալանավորումը վերացվել է։

Հեղինակ՝ Իզաբել Սահակյան

Աղբյուր` Փաստինֆո