Փաստ ինֆո

Վերաքննիչ քրեական դատարանում ՀՀ արդարադատության նախարարությունն ուսումնասիրել է 18 դատավորից 10֊ի վարույթում գտնվող գործերը, մինչդեռ՝ Վերաքննիչ քաղաքացիական և Վերաքննիչ վարչական դատարաններում՝ բոլոր դատավորների գործերը։ ԲԴԽ ներկայացված փաստաթուղթը՝ ՀՀ արդարադատության նախարարության ուսումնասիրությունների վերաբերյալ՝ կազմվել է հապճեպ՝ երկու֊երեք օրվա ընթացքում՝ բացառապես ԲԴԽ ներկայացնելու համար։ Վերաքննիչ քրեական դատարանի դատավոր Վազգեն Ռշտունու ներկայացուցիչները գտնում են, որ նախարարության ներկայացրած ուսումնասիրությունը միայն խորացնում է կասկածները, որ նախարարության կողմից խտրական մոտեցում է ցուցաբերվել։

Դատավորի ներկայացուցիչ Սիրանուշ Սահակյանն արձանագրեց, որ ուսումնասիրությունն ավարտվել է դատավոր Ռշտունու գործերի ամսաթվով, ինչը ևս պատահական չէ և ապացուցում է խտրական մոտեցումը։ Ներկայացված ուսումնասիրությունը, ըստ դատավորի ներկայացուցչի, չի ներկայացնում ամբողջ պատկերը, չկա որևէ հիմնավորում և մերկապարանոց հետևություններ են արվել։ Բացի այս՝
փաստաթղթի ստեղծողն անհայտ է, հայտնի չէ, թե որ աշխատակիցներն են կատարել ուսումնասիրությունները, հայտնի է, որ վերահսկողական ծառայության աշխատակիցները նման լիազորություն չեն ունեցել։

Փաստաբանի խոսքով՝ որևէ բացատրություն չի ներկայացվել, թե ինչու է զեկուցագիր ներկայացվել հենց դատավոր Ռշտունու նկատմամբ։
Նշենք, որ դատական դեպարտամենտի կողմից ստացված պատասխանի համաձայն՝ աիձակուրդ մեկնելու հիմքով Վերաքննիչ դատարանում ևս մեկ դատավոր է քրեական գործերը վերամակագրման հանձնել։ Վերջինս վերամակագրման է հանձնել չորս գործ։

Հիշեցնենք, որ կարգապահական վարույթը վերաբերում է դատավորի կողմից երկարատև արձակուրդ մեկնելու հիմքով քրեական գործերը վերամակագրման հանձնելուն։ ՀՀ արդարադատության նախարարությունը դատավորի նկատմամբ կարգապահական վարույթը հարուցել է՝ սեփական նախաձեռնությամբ՝ առանց որևէ միջնորդության, բողոքի։ Նկատենք, որ կարգապահական վարույթը վերաբերում է դատավոր Վազգեն Ռշտունու վարույթում գտնվող գործերից 10-ին, որոնք վերամակագրվել են։

Հեղինակ՝ Իզաբել Սահակյան

Աղբյուր` Փաստինֆո