Փաստ ինֆո

Էդմոն Մարուքյանն ու մի քանի դատարան ակնհայտորեն ծառայում են գործող իշխանությանը, սպասարկում են նրանց շահերը՝ Վանաձորը չսիրելու հաշվին:

«Փաստինֆո»-ի հետ զրույցում հայտարարեց «Հայրենիք» կուսակցության Վանաձորի տարածքային կառույցի ղեկավար Վահե Դոխոյանը:

Ավելի վաղ «Փաստինֆո»-ն հայտնել էր, որ ՔՊ-ն, «Լուսավոր Հայաստան»-ի գործուն աջակցությամբ, փորձում է իշխանությունն իր ձեռքը վերցնել Վանաձորում:

Վանաձորում ՏԻՄ ընտրություններին մասնակցած 10 քաղաքական ուժերից 5-ն էին հաղթահարել անցողիկ շեմը։ «Մամիկոն Ասլանյան» դաշինքը ստացել էր 15 մանդատ, «Քաղաքացիական պայմանագիրը»՝ 9 մանդատ, Հայաստանի աշխատավորական սոցիալիստական կուսակցությունը՝ 5 մանդատ, իսկ «Հայրենիք» և «Ապրելու երկիր» կուսակցություններն՝ 2-ական մանդատ։

Ավագանի չընտրված ԼՀԿ-ն դեկտեմբերի 5-ի ՏԻՄ ընտրություններից հետո դիմել էր Վարչական դատարան, որպեսզի անվավեր ճանաչվեն Վանաձորի համայնքապետի ընտրությունները, սակայն դատարանը մերժեց ԼՀԿ-ի հայցը։ Նաեւ առանձին միջնորդություն էր ներկայացրել Վարչական դատարան՝ պահանջելով պարտավորեցնել Վանաձոր համայնքի ավագանուն ձեռնպահ մնալ Վանաձոր միավորված համայնքի ղեկավար ընտրելուն ուղղված գործողություններից, այն է՝ համայնքի ղեկավար ընտրելու օրակարգով նիստ անցկացնելուց և ղեկավար ընտրելուց, ինչը բավարարվել էր։
Թեև դատարանն անփոփոխ էր թողել Վանաձորի ՏԻՄ ընտրության արդյունքներն ամրագրող որոշումը, սակայն ավագանին նիստ չի կարողանում հրավիրել, քանի որ չի վերացվել նիստ հրավիրելն արգելող դատարանի որոշումը։

«Փաստինֆո»-ի հետ զրույցում «Հայրենիք» կուսակցության Վանաձորի տարածքային կառույցի ղեկավար Վահե Դոխոյանը հայտնեց, որ դատարանի որոշումը շարունակում է ուժի մեջ մնալ, ավագանին չի կարողանում նիստ գումարել, որպեսզի քաղաքապետ ընտրի, ինչի հետևանքով այնտեղ քաոսային իրավիճակ է.

«Դատարանը որոշում չի կայացրել՝ քաղաքապետի ընտրության օրակարգով նիստ անցկացնելու հետ կապված, սպասում ենք, մոտ օրերս կունենանք որոշում:

Այս պահին հայցերը հերթով մերժվում են, Էդմոն Մարուքյանը բողոքարկում է հաջորդ ատյաններ չենք էլ հասցնում վիճարկենք, որովհետև դա այնքան հիմար վճիռ է, անմիտ պահանջ է, որ ցանկացած դատարան մերժում է, ուղղակի պրոցես ենք ձգում, մինչև հասկանան՝ ինչ կարող են հօգուտ իրենց անել»,-ասաց նա:

Զրուցակցի բնորոշմամբ՝ ԼՀԿ-ի հայցը «կատարյալ հիմարություն է».

« Ի՞նչ է նշանակում, եթե ես չեմ անցել, ուրեմն անվավեր ճանաչեք ընտրության արդյունքները:

Բա Մարուքյանը թող մտներ դատարան ու ԱԺ արտահերթ ընտրությունների արդյունքներն անվավեր ճանաչեր, էնտեղ էլ չէր անցել: Ուղղակի հասկանում ես, որ մի քանի դատարան ու Էդմոն Մարուքյանը ծառայում են գործող իշխանություններին, չգիտեմ ինչի դիմաց, վանաձորցիներին ու Վանաձորը չսիրելու հաշվին՝ նա ծառայում է իշխանությանը, պետք որ լուրջ բան լինի սրա համար»,-ասաց նա:

Զրուցակցի հաղորդմամբ՝ Վանաձորի քաղաքապետարանի աշխատանքը արդեն մի քանի ամիս պարալիզացված է, քաղաքապետարանը չի կարողանում կատարել իր գործառույթները, սրա հետևանքով վանաձորցիները գրեթե ամեն օր նոր խնդիրների են բախվում.

«Հարց է առաջանում՝ ինչու՞ են այդ մարդիկ վարձատրվում, եթե վանաձորցուն ծառայություն չեն մատուցում:Մարդիկ ոչ մի բանից չեն կարողանում օգտվել: Մեր երկրում պաշտպանված են միայն իշխանության և շների շահերը, շուն չի կարելի խփել, շունը բացարձակ արժեք է դարձել, ինչպես նաև իշխանության ներկայացուցիչը»,-ասաց նա:

Աղբյուր` Փաստինֆո