Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի նկատմամբ ոչ միայն քաղաքական, այլև՝ որոշ առումով անձնական հաշվեհարդար է իրականացվում։ Այս մասին «168 Ժամ»-ի խմբագիր Սաթիկ Սեյրանյանի հեղինակած «Պրեսսինգ» հաղորդաշարի եթերում ասել է Աղվան Հովսեփյանի պաշտպանական խմբի անդամ Երեմ Սարգսյանը։ 

«Աբսուրդ, անհիմն մեղադրանքների էությունը հետևյալն է, ասում են՝ քո որդիները, որ բիզնեսով են զբաղվել, իրենք չեն զբաղվել, դու ես զբաղվել, ու ինչքան գումար են աշխատել՝ ապօրինի է, այսինքն՝ ապօրինի ձեռնարկատիրությամբ ես զբաղվել, իսկ եթե գումարն ապօրինի է, հետևաբար, դա ինչ որ ձևով ծախսելը փողերի լվացում է»,- նշեց Երեմ Սարգսյանը՝ հավելելով, որ կարող է մի շարք գործերով օրինակներ բերել, որտեղ քննչական մարմիններն իրավացիորեն չեն գնահատել դա որպես փողերի լվացում՝ նույն փաստական հանգամանքներով։

Փաստաբանն ընդգծում է՝ մեղադրանքներն աբսուրդ է, ընդհանրապես հանցագործության հատկանիշ չկա, բայց արհեստական ստեղծում են հանցագործություններ, որոնք ինչ-որ վերլուծությունների արդյունքում վերածվում են մի քանի հանցագործությունների, ընդ որում՝ ծանր։
«Եթե այսքանը լսելուց հետո որևէ մեկը կարող է ասել, որ այդպես չէ, մեղադրանքը կտամ՝ թող ուսումնասիրի և այդքանից հետո վերլուծենք՝ սա սովորական իրավական գործընթաց է, ինչպես սիրում են ասել, թե ուղիղ հետապնդում է՝ քաղաքական կամ անձնական։ Եթե խտրական մոտեցում են ցուցաբերում և դրանից հետո տեսնում ենք, որ ուրիշների մասով նույն իրավիճակը չէ, այսինքն՝ կալանավորումն ինչու եք անում, քննիչն էլ դատարանում ասում է՝ նույնիսկ գրավը չի կարող պատշաճ վարքագիծն ապահովել, որևէ մեկը մինչև հիմա դրա պատճառաբանությունը տվե՞լ է, թե ինչու չի կարող գրավով ազատ արձակվել, երբ նախաքննությունը մեկ անգամ ավարտվել է, երկրորդն էլ՝ նորից ավարտին է մոտենում և, ըստ էության, ընդամենը մի քանի հարցում պետք է անել»,- նշեց Սարգսյանը։

Դիտարկմանը, որ Գագիկ Ջհանգիրյանը՝ գլխավոր դատախազի տեղակալ եղած ժամանակ ունեցել է լարված հարաբերություններ Աղվան Հովսեփյանի հետ, Դավիթ Արղամանյանի հայրը՝ Մհեր Արղամանյանը Վարդան Ջհանգիրյանի գործով դատարանի կազմում է եղել, բացի այդ՝ Արթուր Դավթյանի, Սասուն Խաչատրյանի կարիերային աճը եղել է Աղվան Հովսեփյանի օրոք, խնդիրներ է եղել նաև Սասուն Խաչատրյանի հոր՝ Մհեր Խաչատրյանի հետ և, ի վերջո, ով է տեսնում այդ հաշվեհարդարը՝ Սարգսյանն արձագանքեց՝ նշելով, որ Աղվան Հովսեփյանից համաձայնություն չի ստացել՝ անձնական խնդիրների մասին խոսելու, սակայն, որպես համակարգին մոտ կանգնած անձ՝ գիտի, որ լարվածություններ եղել են, իսկ թե ում միջև և ինչպես՝ բոլորին հայտնի է։ Միևնույն ժամանակ, Սարգսյանն ընդգծեց, որ որոշիչ պաշտոններ զբաղեցնող անձինք՝ ունեն անձնական խնդիրներ Աղվան Հովսեփյանի հետ և այս անձանց գործողություններն ակնհայտ երևում են։

«Եթե այս անձինք չլինեին որոշիչ գործոն ունեցող անձինք, Աղվան Հովսեփյանն այս մեղադրանքներով չէր մեղադրվի, այս մեղադրանքներով կալանքի տակ չէր լինի»,-նշեց նա՝ հավելելով, որ անձնական խնդիրները միանշանակ ակնհայտ են և այս դեպքում առաջատար դիրքերում են այն դատավորները, որոնք միշտ եղել են կամակատար վիճակում և նրանց օգտագործելու միջոցով՝ Աղվան Հովսեփյանին շարունակական կալանքի տակ են պահում։

Աղբյուր` Փաստինֆո