Փաստ ինֆո

Վահան Բադասյանի գործով դատախազ Հայկ Երեմյանը պահանջում է մեղավոր ճանաչել Բադասյանին։ «Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, այսօր կայացել է Վահան Բադասյանի գործով դատական նիստը, որի ընթացքում մեղադրող դատախազ Հայկ Երեմյանը մեղադրական ճառով է հանդես եկել՝ միջնորդելով մեղավոր ճանաչել Բադասյանին՝ ՀՀ քրեական օրենսգրքի 301-րդ հոդվածի հատկանիշներով և որպես պատիժ կիրառել տուգանքը՝ նվազագույն աշխատանքի հինգ հարյուրապատիկի չափով (500.000 ՀՀ դրամ)։ Հաշվի առնելով, որ Բադասյանը 13 օր կալանավորված է եղել, ուստի դատախազը գտնում է, որ պետք է մեղմացնել նշանակված պատիժը և տուգանքի չափ սահմանել՝ 450.000 ՀՀ դրամը։ Որպես մեղմացնող հանգամանք է դիտարկվել նաև Բադասյանի անձը բնութագրող հատկանիշները, վերջինիս մասնակցությունը՝ Արցախյան պատերազմին և լուրջ վիրավորում ստանալը։

Հաջորդ դատական նիստը, որը նշանակվել է մարտի 7-ին, ճառով հանդես կգա պաշտպանության կողմը։

Հիշեցնենք, որ 2021թ հունվարի 28-ին ԱԱԾ-ն բերման է ենթարկել, ապա՝ ձերբակալել Վահան Բադասյանին՝ Եռաբլուր զինվորական պանթեոնում իր կողմից արված հայտարարությունների համար։ Վերջինս հայտարարել է, որ Նիկոլ Փաշինյանը կործանել է բանակը և նրան պետք է հեռացնեն ոչ միայն որպես պարտության խորհրդանիշ, այլև թշնամի․

«Հեռացնելու տարբեր ճանապարհներ կան ընդհուպ ֆիզիկապես հեռացնելը։ Դա ենթադրում է, որ թշնամուն պետք է վերացնենք, թեկուզ զենքի ուժով։ Այո, ես գիտակցաբար սպառնալիքի կոչեր եմ անում, թող ԱԱԾ-ն ձերբակալի ինձ։ Ցանկացած մեկը պետք է ցանկանա թշնամուն ոչնչացնել։ Դա անհատները պետք է անեն։ Ես ինքս պատրաստ եմ դրան»,-ասել է Վահան Բադասյանը։

Այս հայտարարություններից հետո հարուցվել է քրեական գործ, որի շրջանակներում նրան մեղադրանք է առաջադրվել ՀՀ քրեական օրենսգրքի 301-րդ հոդվածի հատկանիշներով՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերի համար։ Բադասյանն առաջադրված մեղադրանքը չի ընդունել։

ԱԱԾ քննիչը Վահան Բադասյանի նկատմամբ կալանավորումը որպես խափանման միջոց ընտրելու մասին միջնորդություն էր ներկայացրել դատարան, որը բավարարվել է։ Հետագայում դատախազի որոշմամբ Բադասյանի նկատմամբ ընտրված խափանման միջոց կալանավորումը վերացվել է։

Հեղինակ՝ Իզաբել Սահակյան

Աղբյուր` Փաստինֆո