Փաստ ինֆո

ՊԲ N զորամասի հրետանային դիվիզիոնի պատասխանատու սպա, մայոր Գևորգ Գևորգյանը կշարունակի մնալ կալանավորված։ Սյունիքի մարզի ընդհանուր իրավասության դատարանը՝ դատավոր Լուսինե Սեփխանյանի նախագահությամբ, գործի՝ դատաքննության նախապատրաստման փուլում անփոփոխ է թողել նրա նկատմամբ ընտրված խափանման միջոց կալանավորումը։ 

Հիշեցնենք, որ քրեական գործով Գեւորգ Գեւորգյանին մեղադրանք է առաջադրվել՝ ՀՀ քրեական օրենսգրքի 375-րդ հոդվածի 4-րդ մասով. ըստ նախաքննական մարմնի՝ անձնական շահագրգռվածությունից ելնելով` սեփական կյանքը փրկելու նպատակով, ՊԲ N զորամասի հրետանային դիվիզիոնի պատասխանատու սպա, մայորը դրսևորել է իշխանության անգործություն, որն առաջացրել է ծանր հետևանքներ։ Նախաքննության ընթացքում Գևորգյանը ցուցմունք է տվել՝ հայտնելով, որ երբ իրենց Ֆիզուլիի հատվածում տեղափոխել են նշված տեղամաս, տվել են նշանակետեր, որոնք Դ-20 տիպի հրանոթով խոցում էին, հասկացել է, որ մեր խոցելի հեռավորությունը 4200 մ է, մինչդեռ այդ տիպի հրանոթը խոցում է մոտ 17 կմ, ինչից մայորի մոտ հարց է առաջացել, թե ինչու այդքան հեռահար խոցող զինտեխնիկան տեղադրված է 4 կմ հեռավորության վրա, ինչի վերաբերյալ մտահոգությունը բարձրացրել է նաև հրամանատարության կազմի մոտ։

«Ասել է՝ թշնամական հետևակն այդ տարածությունը շատ կարճ ժամանակահատվածում կարող է անցնել, կհայտնվենք ծուղակում, որևէ տրամաբանություն չկա։ Կարճ ժամանակ անց տեղափոխում են Հադրութի տակ «Ջրաշխարհ» կոչվող տեղամաս, որտեղից նույն առաջադրանքն են կատարել, այս անգամ՝ 8 կմ հեռավորությամբ։ Տրամաբանական էր այդ հեռավորությամբ որոշակի խոցելի նշանակետեր տալն ու խոցելը, բայց այդտեղ նորից հրաման են տվել տեղափոխվել, զինամթերքը հավաքել են, ամբողջ զորքը տեղափոխել են 4 կմ ավելի հեռու, որը կրկին համապատասխան տեղը չէր, բայց տրամաբանական էր ավելի անվտանգ պահելու համար»,- ավելի վաղ հայտարարել էր փաստաբանը։

Նշենք, որ զոհված զինծառայողների հարազատներն էլ իրենք են իրենց հետաքննությունն իրականացրել՝ գտնելով, որ իրականում կա «մեղավորների բուրգ»։

Քրեական գործով նախաքննությունն ավարտվել է.դատախազությունը հաստատել է մեղադրական եզրակացությունը և գործն ուղարկել Սյունիքի մարզի ընդհանուր իրավասության դատարան, որտեղ գործը մակագրվել է դատավոր Լուսինե Սեփխանյանին։
Դատարանն արդեն քննարկել է Գևորգյանի խափանման միջոցի հարցը և անփոփոխ է թողել Գևորգյանի նկատմամբ ընտրված խափանման միջոց կալանավորումը։

Գևորգ Գևորգյանի պաշտպան Գոռ Գևորգյանը «Փաստինֆո»-ի հետ զրույցում ասաց, որ դատարանը որոշումը կայացվել է ապօրինի՝ խախտելով քրեադատավարական մի շարք նորմեր, ինչը հետագայում կառաջացնի հետևանք՝ դատարանի համար։ Մասնավորապես, Գևորգյանի խափանման միջոցի հարցը դատարանը քննել է՝ առանց պաշտպանության կողմի ներկայության։ Նշված հարցը պաշտպանության կողմը բարձրացրել է նաև կալանավորումն անփոփոխ թողնելու մասին որոշման դեմ ներկայացված վերաքննիչ բողոքում, որը դեռևս մակագրված չէ։ Վերաքննիչ բողոքում բարձրացվել են մրցակցության սկզբունքի, պաշտպանության իրավունքի, մեղադրյալի՝ լսված լինելու իրավունքի կոպտագույն խախտումները։

Նկարում՝ փաստաբան Գոռ Գևորգյանն է

Հեղինակ՝ Իզաբել Սահակյան

Աղբյուր` Փաստինֆո