Փաստ ինֆո

Գարնանացանի աշխատանքները որոշ համայքներում արդեն մեկնարկել են․ Գեղարքունիքի մարզի Գեղամասար համայնքում գյուղատնտեսական աշխատանքների ակտիվ փուլը կսկսվի մոտ երկու շաբաթից։ Խոշորացված համայնքի բնակիչները, սակայն, դժվար վիճակում են հայտնվել։ 

«Գյուղացիներն ակնկալում էին, որ սերմացուի, վառելիքի, պարարտանյութի սուբսիդավորում կլինի, բայց Կառավարությունը չի հաստատել սուբսիդավորման ծրագիրը, ու հույս էլ չկա, որ կհաստատվի։ Առանց այդ էլ, պատերազմից հետո ոչ մեկը չի կարողանում նորմալ գյուղատնտեսական աշխատանք կատարել, եթե սուբսիդավորում էլ չլինի, գյուղատնտեսությունը լրջորեն կտուժի»,-«Փաստինֆո»-ի հետ զրույցում ասում է Գեղամասարի համայնքապետ Հակոբ Ավետյանը։

2021թ․ մայիսից հետո, երբ ադրբեջանցիները ներխուժելով ՀՀ սուվերեն տարածք ու ապօրինաբար տեղակայվելով մասամբ՝ հայկական բնակավայրերի վարչական տարածքում, մասամբ էլ՝ անմիջապես հարևանությամբ, անասնապահությամբ ու վարուցանքով զբաղվելը բազմաթիվ գյուղերում գրեթե անհնար դարձավ։

«Խոտհարքերի ու արոտավայրերի մի մասը թշնամու հսկողության տակ է անցել։ Մնացածի մեծ մասն էլ սահմանին շատ մոտ են՝ թշնամու նշանառության տակ։ Սահմանից մոտ 3-4 կմ շառավղով հնարավոր չի ընդհանրապես օգտագործել, մարդիկ վախենում են մոտ գնալ։ Անվտանգային խնդիրը սուր է հատկապես Կութ, Սոթք, Ազատ, Նորաբակ գյուղերում»,-ասում է համայնքապետը։

Ավետյանն ասում է՝ մարդիկ ավելի զգուշավոր են դարձել հատկապես Կութի դեպքից հետո, երբ ավելի քան 80 խոշոր եղջերավոր անասուն անցել է սահմանային գիծն ու չի վերադարձել։

Թշնամու կողմն անցած անասունների համար գյուղացիները մինչև հիմա փոխհատուցում չեն ստացել։ Ընտանիքները, որոնց եկամտի միակ աղբյուրն այդ անասուններն էին, անելանելի վիճակում են հայտնվել։

«Այդ տարածաշրջանի բնակչության եկամտի հիմնական աղբյուրն անասնապահությունն է։ Դա էլ մեծ եկամուտ չի հետապնդում, ուղղակի, այդ մարդկանց ապրուստի միջոցն է։ Դե պատկերացրեք՝ ինչ վիճակում են հիմա․ միանգամից կորցրել են տարիների ընթացքում տքնանքով ստեղծածը։ Մարդիկ արդեն վաղվա օրը չեն տեսնում, դրա համար էլ բազմաթիվ ընտանիքներ որոշել են տեղափոխվել այլ բնակավայրեր կամ երկրից արտագաղթել»,-ասում է Հակոբ Ավետյանը։

Նրա խոսքով՝ անվտանգության երաշխիքների բացակայությունն ու ապրուստի միջոց հանդիսացող անասնապահության ծավալների կրճատումն այդ տարածաշրջանից արտագաղթի ծավալը կարող է զգալի մեծացնել։

Աղբյուր` Փաստինֆո