Փաստ ինֆո

Փաստորեն Կառավարությունը հաստատել է 226 միլիոն դոլար արժողությամբ ծրագիր՝ առանց ծրագրի եկամտաբերության մոտավոր հաշվարկի։ Այս մասին ԱԺ-ում հայտարարեց «Հայաստան» խմբակցության պատգամավոր Արթուր Խաչատրյանը։ 

Խաչատրյանը հիշեցրեց, որ Նիկոլ Փաշինյանն ասուլիսներից մեկում խոսե։ է ենթակառուցվածքային ծրագրերի արդեն համաձայնեցված Երասխ-Ջուլֆա-Օրդուբադ-Մեղրի-Հորադիզ երկաթգծի տնտեսական հիմնավորվածության մասին, տնանզիտից ակնկալվող եկամուտները։ Պատգամավորը տեղեկատվություն էր խնդրել, թե 20 տարվա կտրվածքով որքան է կազմում ներդրումների ծախսածածկման ժամկետը, սպասվող եկամտաբերությունը, սպասվող հարկային մուտքերը, սպասվող ուղևորափոխադրումներն ու բեռնափոխադրումները՝ նեռարյալ տրանզիտային հոսքերը, շինարարության արժեքը, ինչին ի պատասխան ՏԿԵ նախարարը նշել է միայն մոտավոր արժեքը, իսկ ինչ վերաբերում է տնտեսական հիմնավորվածությանը, ապա նախարարությունից պատասխանել են, որ դրան կարող են պատասխանել վերջնական նախագիծը կազմելուց և տեխնիկատնտեսական ուսումնասիրության ամփոփումից հետո։

«Կառավարությունը, փաստորեն, 226 միլիոն դոլար արժողությամբ ծրագիր է հաստատել՝ առանց ծրագրի եկամտաբերության կամ երկաթուղու ծանրաբեռնվածության վերաբերյալ մոտավոր հաշվարկի», -նշեց Խաչատրյանը։

Պատասխանելով Խաչատրյանի հարցին՝ ՀՀ փոխվարչապետ Մհեր Գրիգորյանը նշեց, որ այս պահին որոշումները կայացվել են ինդիկատիվ թվերի հիման վրա ու նոր պետք է իրականացվեն խոշորացված հաշվարկներ։ Նրա փոխանցմամբ՝ որպեսզի հասկանանք ներդրումների ծավալը, նախևառաջ, պետք է ունենանք վերջնական նախագիծն իր բոլոր դետալներով:

« Այսօր, այդ թվում օտարերկրյա փորձագետների հաշվարկով, այդ թևի վերականգնման աշխատանքների մոտավոր արժեքը 226-230 միլիոն դոլար կկազմի ու տևողությունը կլինի մինչև 36 ամիս: Միայն բեռնափոխադրումների մասով 3 միլիոնի միջին չափ ունենք՝ առանց ապաշրջափակման, որից 2-ը ներքին բեռնափոխադրումներն են: Եթե մենք այսօր տեսնենք «Հարավկովկասյան երկաթուղու» հարկային մուտքերը, դրանք կազմում են շուրջ 4,7 միլիարդ ու եթե հաշվենք, որ ապաշարջափակման պարագայում առնվազն կկրկնապատկվեն հոսքերը, մենք գալիս ենք նվազագույնը 5 տոկոս եկամտաբերության, որը վատ չէ», - ասաց ՀՀ փոխվարչապետը:

Աղբյուր` Փաստինֆո