Փաստ ինֆո

Հայաստանում ցանկացած քաղաքական գործընթաց որոշվում է մեկ անձի կողմից, մնացած բոլորը, թե ՔՊ-ն է առաջադրել նախագահի թեկնածու կամ մեկ այլ բան, հեքիաթներ են: ԱԺ-ում լրագրողների հետ զրույցում ասաց «Պատիվ ունեմ» խմբակցության քարտուղար Հայկ Մամիջանյանը՝ անդրադառնալով նախագահի պաշտոնում ԲՏԱ նախարար Վահագն Խաչատուրյանի նշանակմանը.

«Այս մարդն ընտրվել է Նիկոլ Փաշինյանի կողմից, աշխատելու է Նիկոլ Փաշինյանի մոտ նախագահ։ Պարոն Խաչատուրյանը Հանրայինի եթերում բառացի հայտարարել է, որ գործող քաղաքական թիմի անդամ է։ Վերկուսակցական արբիտր, անաչառություն, զսպումներ, հակակշռումներ, այս ամեն ինչը մոռացվում է այդ նախադասությունից հետո», - ասաց Մամիջանյանը։

Հիշեցնենք, որ խորհրդարանում քննարկվում է ՀՀ նախագահի ընտրության հարցը:

Նախագահի միակ թեկնածուն ԲՏԱ նախարար Վահագն Խաչատուրյանն է, որին առաջադրել է իշխող «Քաղաքացիական պայմանագիր» խմբակցությունը, ընդդիմությունը թեկնածու չի առաջադրել:

Ընդդիմադիր «Պատիվ ունեմ» և «Հայաստան» խմբակցությունները լքեցին նիստերի դահլիճը:

Լրագրողների հետ զրույցում Հայկ Մամիջանյանը հայտարարեց, որ նախագահի ընտրության գործընթացը լեգիտիմացնելու ցանկություն չունեն։

«Սա նոնսենս է, ես այպիսի բան չեմ մտաբերում, որ օրինակ՝ ՄԻՊ ընտրվի միայն իշխող խմբակցության ձայներով, որովհետև ինքը Մարդու իրավունքների պաշտպան չէ, այլ՝ Նիկոլ Փաշինյանի իրավունքների պաշտպանը, նույնն էլ լինելու է նախագահի դեպքում»,-ասաց Հայկ Մամիջանյանը:

Դիտարկմանը, թե ստացվում է, որ ընդդիմության գործողություններն էլ է Նիկոլ Փաշինյանը վերահսկում, Հայկ Մամիջանյանը արձագանքեց,

«Իշխանության ներկայացուցիչներից որևէ մեկի մտքով կամ երազում անգամ չի կարող անցնել վերահսկել ընդդիմության գործողությունները»:

Աղբյուր` Փաստինֆո