Փաստ ինֆո

ԱԺ ընդդիմադիր պատգամավորներից 6-ն անցնում է ապօրինի ծագում ունեցող գույքի բռնագանձման մասին օրենքով, հիմա էլ վիճարկել են այն ՍԴ-ում: ԱԺ-ում հայտարարեց «Քաղաքացիական պայմանագիր» խմբակցության պատգամավոր Վահագն Ալեքսանյանը.

«Ապօրինի ծագում ունեցող գույքի բռնագանձման մասին օրենքը ընդդիմադիր խմբակցությունների համար թիրախ է:

Այն ինչ տեղի է ունենում ԱԺ-ում նախագծերի, ելույթների և հայտարարությունների մակարդակով, ընդամենը շղարշ է, որի ներքո կարելի է պայքարել հենց իրենց կենսական և առանցքային շահերի համար, որն էլ իրենից ենթադրում է ապօրինի ծագում ունեցող գույքի պաշտպանություն և պահպանում»,-ասաց Վահագն Ալեքսանյանը:

«Պատիվ ունեմ» խմբակցության քարտուղար Հայկ Մամիջանյանն էլ, արձագանքելով ՔՊ ական պատգամավորի ելույթի , ասաց, որ համար զարմանալի չէ, որ ԱԺ պատգամավորները տարրական իրավունքի նորմերի ոտնահարում են դրսևորում՝ դեռևս Սահմանադրական դատարանում վարույթ չընդունված հարցի վերաբերյալ հայտնելով կարծիք.

«Սա խիստ մտահոգիչ է, բայց դա ձեր հետագա մեղադրական դատավճռի մեջ նույնիսկ տեղ էլ չի գտնի, որովհետև այլ մեղսագործությունները շատ ավելի շատ են»,-ասաց Մամիջանյանը:

Ընդդիմադիր պատգամավորն անդրադարձավ նաև Վահագն Ալեքսանյանի մեկ այլ հայտարարությանը, թե իրենց իշխանությունը շատ է անհանգստանում ժողովրդի մասին.

«Հիմա ձեզ ցույց կտամ, թե մենք ինչպես էինք անհանգստանում։ Մի քանի տվյալ, դուք սիրում եք տվյալներ, ճիշտ է՝ լավ չեք կարողանում կարդալ, բայց սիրում եք. ՀՀԿ-ի կառավարման տարիներին ՀՆԱ-ն աճել է 210 տոկոսով, մեկ շնչին ընկնողը՝ շուրջ 2 անգամ, նվազագույն աշխատավարձը 3,6 անգամ աճել է, աճել է միջին աշխատավարձը, միջին կենսաթոշակը ու պետական բյուջեի մուտքներն աճել են 2,3 անգամով»,-դիմելով ՔՊ-ականներին՝ ասաց Մամիջանյանը:

Աղբյուր` Փաստինֆո