Փաստ ինֆո

Իրանը ռուս-ուկրաինական պատերազմում չեզոք դիրքորոշում ունի, նա ամեն կերպ խուսափում է ՆԱՏՕ-ի հետ առճակատման գնալուց: «Փաստինֆո»-ի հետ զրույցում նման արձանագրում արեց իրանագետ Գարիկ Միսակյանը:

Ըստ նրա՝ Իրանը խուսափում է որևէ կերպ ներգրավվել ռուս-ուկրաինական պատերազմում, քանի որ եթե Իրանը որպես ռուսական կողմի աջակից ներգրավվի պատերազմում, ապա դա կնշանակի նաև առճակատում ՆԱՏՕ-ի հետ, որն Իրանի համար անթույլատրելի է, քանի որ Իրանը փորձում է գնալ որոշակի կարգավորումների Արևմուտքի հետ:

Փորձագետի խոսքով՝ Իրանն, առհասարակ, միջազգային խոշոր ընդհարումների ժամանակ մշտապես չեզոք դիրքորոշում է ունեցել, ինչն Իրանի արտաքին քաղաքական սկզբունքներից է և բխում է նաև իր պետական շահերից.

«Այս փուլում էլ Իրանը խուսափում է անմիջականորեն պրոռուսական հայտարարություններ անելուց, քանի որ դա իր արտաքին քաղաքական դոգմաներում չի տեղավորվում, Իրանի նախագահը և ԱԳ նախարարը հայտարարել են, որ կրակի վրա յուղ լցնողները եղել են ՆԱՏՕ-ն, ԱՄՆ-ն՝ չտալով Ռուսաստանին բավարար երաշխիքներ, այսինքն՝ մյուս կողմից էլ Իրանը փորձում է խնդրի լարվածության մեջ մեղադրել ԱՄՆ-ին և Արևմուտքին, սա նույնպես տեղավորվում է Իրանի շահերի կենտեքստում»,-ասաց իրանագետը:

Նրա արձանագրմամբ՝ Իրանն այս փուլում փորձում է հարևանների հետ՝ այդ թվում Հայաստանի հետ հարաբերություններն ամրապնդել՝ ավարտին հասցնելով «Հյուսիս-Հարավ» ավտոճանապարհի կառուցումը, որը կլինի քաղաքական գործիք Իրանի համար՝ թուրքական աշխարհը տարանջատելու և թուրքական աշխարհների միացումը թույլ չտալու համար, ինչից կարող է Հայաստանը ևս իր շահերը քաղել՝ Սյունիքի աշխարհաքաղաքական իրավիճակի հետ կապված:

Ըստ փորձագետի՝ այս դեպքում Իրանի և Հայաստանի շահերը համընկում են.

«Եթե Իրանը ներկա բարդ իրավիճակում կարողանա Արևմուտքի հետ հասնել համաձայնության և թուլացնել պատժամիջոցները, նաև մեզ համար դուռ կբացվի Իրանի հետ համագործակցության համար, իսկ եթե Ռուսաստանը շարունակի մնալ պատժամիջոցների տակ , այստեղ կարող է Հայաստանի դերակատարումը մեծանալ Իրան-Ռուսաստան հարաբերություններում, այսինքն՝ միշտ կան շանսեր, որոնցից պետք է օգտվել»,-ասաց նա:

Աղբյուր` Փաստինֆո