Փաստ ինֆո

Փետրվարի 28-ին ՀՀ ԱԺ պետական-իրավական հարցերի մշտական հանձնաժողովը Վլադիմիր Վարդանյանի նախագահությամբ հրավիրած նիստում առաջին ընթերցմամբ քննարկել է ԱԺ պատգամավոր Արամ Վարդեւանյանի հեղինակած ««Ձերբակալված եւ կալանավորված անձանց պահելու մասին» օրենքում փոփոխություններ կատարելու մասին» օրենքի նախագիծը:

Նախաձեռնությամբ առաջարկվում է ձերբակալվածներին պահելու վայր եւ կալանավորվածներին պահելու վայր մուտքի եւ ելքի կարգը սահմանելու իրավասությունը տալ պետական կառավարման լիազորված մարմնի ղեկավարին:

Առանց հատուկ թույլտվության կամ ՀՀ քրեական դատավարության օրենսգրքով նախատեսված սահմանափակումների վերացման՝ ձերբակալվածներին կամ կալանավորվածներին տեսակցելու, ինչպես նաեւ նրանց պահելու վայր անարգել մուտքի եւ ելքի իրավունք ունեն ՀՀ նախագահը, ՀՀ ԱԺ նախագահը, ՀՀ վարչապետը, ՀՀ ՍԴ նախագահը, ՀՀ վճռաբեկ դատարանի նախագահը, ՀՀ Ազգային ժողովի պատգամավորը, պետական կառավարման լիազորված մարմնի ղեկավարը կամ նրա համապատասխան տեղակալը:

Հեղինակը նշել է, որ նախաձեռնության հիմնական նպատակն է ԱԺ պատգամավորին նույնպես թույլատրել առանց հատուկ թույլտվության, անարգել այցելել ձերբակալվածներին եւ կալանվորվածներին:

ՀՀ արդարադատության փոխնախարար Արփինե Սարգսյանը տեղեկացրել է, որ Կառավարության եզրակացությունը բացասական է:

Մշտական հանձնաժողովի նախագահը գործընկերներին առաջարկել է դեմ քվեարկել օրինագծին:

Նշվել է, որ գործող օրենքով լուծված են բարձրաստիճան պաշտոնյաների՝ ձերբակալվածներին եւ կալանավորվածներին տեսակցելու հետ կապված բոլոր խնդիրները: Նա նաեւ փաստել է, որ նմանօրինակ նախագծեր ներկայացվել են դեռեւս 2016 թվականից:

Ընդդիմադիր պատգամավորները կողմ են արտահայտվել, իսկ խորհրդարանական մեծամասնության ներկայացուցիչները՝ դեմ:

Քննարկման արդյունքում հիմնական զեկուցողն առաջարկել է նախագիծը լրամշակել, եւ քվեարկության դնել լրամշակված տարբերակը, ինչին համաձայնել են հանձնաժողովականները:

Նախագծի քվեարկությունը հետաձգվել է 2 ամիս ժամկետով:

Աղբյուր` Փաստինֆո