Փաստ ինֆո

«Չեմ կարծում, թե բանը կհասնի նրան, որ ռուս – ուկրաինական բախումը վերաճի միջուկային զենքի կիրառման վտանգավոր իրողության, մանավանդ, որ արդեն հնչեց համապատասխան հայտարարություն այն մասին, որ ՆԱՏՕ-ն չի սպառնում Ռուսաստանի Դաշնությանը։ Թեև,այնուամենայնիվ, կանխատեսումներ անել՝ թե ի՞նչ ընթացք կստանա կամ ինչո՞վ կավարտվի այս պատերազմը, մեծ իմաստով, անշնորհակալ գործ է»,- «Փաստինֆո»-ի հետ զրույցում ասում է միջազգային անվտանգության հարցերով փորձագետ Արմեն Մանվելյանը։

Հիշեցնենք, որ փետրվարի 24-ի վաղ առավոտյան ՌԴ նախագահ Վլադիմիր Պուտինը հայտարարեց Դոնեցկում հատուկ ռազմական գործողություն իրականացնելու մասին։ ԵՄ-ն, ԱՄՆ-ն մի շարք տնտեսական պատժամիջոցներ են կիրառել Ռուսաստանի նկատմամբ, փակել իրենց օդային տարածքը՝ ռուսական ինքնաթիռների համար, ինչին ի պատասխան ՌԴ-ն եւս փակել է իր օդային տարածքը։ Ավելին՝ Պուտինն արգելել է ռուսական ռեզիդենտներին արտարժույթով օտարերկրյա փոխառություններ տրամադրել և արտարժույթ փոխանցել ՌԴ սահմաններից դուրս գտնվող բանկերում գտնվող հաշիվներին։

Տնտեսական սանկցիաներին զուգահեռ ԵՄ-ն հայտարարել է Ուկրաինային ռազմական օգնություն ցուցաբերելու մասին։

Հարցին՝ ինչպիսի՞ անդրադարձ կունենան ռուս – ուկրաինական արյունալի բախումները մեր տարածաշրջանի և, մասնավորապես, Հայաստանի Հանրապետության սահմանների մոտ՝ փորձագետ Արմեն Մանվելյանը պատասխանում է՝ բոլորովին բացառված չէ, որ մեր երկրի սահմաններին նույնպես ռազմական բախումներ կամ սադրանքներ գրանցվեն.«Հայաստանն, իսկապես, խնդիր ունի Թուրքիայի և Ադրբեջանի հետ, սա փաստ է։ Մյուս կողմից հիմա տեղի է ունենում ուժերի հստակ կողմնորոշում՝ թե ով՝ ում է աջակցում։ Եթե Թուրքիայի բռնած դիրքորոշումը հստակ արևմտամետ է, ընդ որում, միշտ է այդպես եղել, ապա Ադրբեջանն այս իմաստով մանևրելու խնդիր ունի, թեև, մեծ իմաստով, չի էլ թաքցնում, որ հակված է դեպի ուկրաինական կողմը։ Գնալով այդ դիրքավորումն ավելի է խորանալու, և թե՛ արևմուտքը, թե՛ ռուսաստանյան կողմը պահանջելու են հստակ դիրքորոշում արտահայտել։ Այսինքն, որքան երկար ձգվեն ռուս ուկրաինական ռազմական բախումներն, այնքան պետությունների համար անհնարին է դառնալու չեզոք մնալու հնարավորությունը»։

Արմեն Մանվելյանի խոսքով՝ Հայաստանը դիտարկվում է որպես հստակ ռուսական ազդեցության պետություն։ Գյումրիում տեղակայված ռուսական ռազմաբազան և Արցախում ռուս խաղաղապահ զորամիավորումների ներկայությունը սա անհերքելի են դարձնում.«Հիմա հարց է հնչում՝ ստեղծված իրավիճակում, արդյո՞ք թուրք -ադրբեջանական տանդեմը կհարձակվի՞ Հայաստանի սահմանների վրա։ Պատասխանեմ այսպես՝ նմանատիպ սցենարն ամենահնարավորներից մեկն է։ Բացառել դա՝ ուղղակի չի կարելի։ Ասեմ ավելին, կարծում եմ, ռուս -ուկրաինական ռազմական բախումներից ընդամենը մեկ օր առաջ, ռուս- ադրբեջանական համատեղ հուշագիրը՝ ռուսական կողմի համար անցանկալի նման սցենարը կանխելու համար էր նաև։ Ամեն դեպքում, ակնհայտ է, որ այդ երկու պետությունները, մեղմ ասած, այնքան էլ դաշնակցական հարաբերությունների մեջ չեն։ Ինչպես արդեն ասացի, այս պահին էլ ընթացող ռուս ուկրաինական ռազմական բախումների ֆոնին, Ադրբեջանն ընդգծված պրոուկրաինական կեցվածք է որդեգրել, թեև այդ մասին պաշտոնական Բաքուն որևէ հայտարարությամբ հանդես չի եկել։ Հետևաբար, ինչի՞ մասին են խոսում այս իրողությունները, այն, որ իրենց համար հարմար պահին, թուրք- ադրբեջանական տանդեմն անպայման գործի կանցնի Հայաստանի սահմանների ուղղությամբ և մենք դրան հնարավորինս պատրաստ պետք է լինենք»,- ասում է փորձագետը։

Նման բարդ իրավիճակում ՀՀ իշխանությունները փոխեցին Զինված ուժերի ղեկավարությանը , ինչը, Արմեն Մանվելյանի գնահատմամբ, բանակը վերջնականապես գլխատելուն է միտված, ինչին մենք ականատես ենք լինում արդեն, ավելի քան երեք տարի։ «44 օրյա պատերազմն ավելի ակնհայտ դարձրեց այս իշխանությունների որդեգրած հակահայկական քաղաքականությունը։ Թեև, արդեն ռուս -ուկրաինական ռազմական բախումների ֆոնին պարզ դարձավ, որ, բացառապես, նույն միտումով է առաջնորդվել նաև ուկրաինական իշխանությունը՝ վերջին երեք տարիների ընթացքում փոխելով սեփական Պաշտպանության նախարարության երեք Գլխավոր շտաբի պետ։ Ձեռագիրն, ինչպես տեսնում ենք, նույն է»,- ասում է Արմեն Մանվելյանը։

Աղբյուր` Փաստինֆո