Փաստ ինֆո

ԲԴԽ-ն կպահանջի ՀՀ արդարադատության նախարարությունից՝ Վերաքննիչ քրեական դատարանի դատավոր Վազգեն Ռշտունու նկատմամբ կարգապահական վարույթի հարուցման հիմքում դրված զեկուցագրի համար հիմք հանդիսացող ուսումնասիրությունները։

Հիշեցնենք, որ կարգապահական վարույթը վերաբերում է դատավորի կողմից երկարատև արձակուրդ մեկնելու հիմքով քրեական գործերը վերամակագրման հանձնելուն։ ՀՀ արդարադատության նախարարությունը դատավորի նկատմամբ կարգապահական վարույթը հարուցել է՝ սեփական նախաձեռնությամբ՝ առանց որևէ միջնորդության, բողոքի։ Նկատենք, որ կարգապահական վարույթը վերաբերում է դատավոր Վազգեն Ռշտունու վարույթում գտնվող գործերից 10-ին, որոնք վերամակագրվել են։

«Փաստինֆո»-ի թղթակցի հաղորդմամբ՝ այսօր ԲԴԽ-ում շարունակվել է դատավոր Վազգեն Ռշտունուն կարգապահական պատասխանատվության ենթարկելու միջնորդության քննությունը։ Դատավորը և նրա ներկայացուցիչ Սիրանուշ Սահակյանն արդեն ներկայացրել են պատասխանը՝ միջնորդության վերաբերյալ։ ՀՀ արդարադատության նախարարության ներկայացուցիչների հարցերին դատավոր Վազգեն Ռշտունին հրաժարվեց պատասխանել։ ԲԴԽ անդամ Գրիգոր Բեքմեզյանի հարցադրմանը, թե ինչու է դատավորը գտնում, որ իր նկատմամբ նախարարը հատուկ հետապնդման գործողություններ իրականացներ՝ Վազգեն Ռշտունին կրկնեց նախկինում իր կողմից հայտնած դիրքորոշումը, որով, դատավորը հիշեցրել էր նախարար Կարեն Անդրեասյանի հայտարարությունները՝ կաշառակեր, կոռումպացված դատավորների վերաբերյալ, դատավորների կաստայի վերաբերյալ, ընդ որում՝ հիշատակվում է 40 դատավորի անուն։ Դատավորը գտնում է, որ ըստ նախարարի՝ ինքը մտնում է այդ 40 դատավորների մեջ, որոնք, ըստ նախարարի, վեթթինգի ենթակա են։

Բեքմեզյանի հարցին՝ ինչ է արել կամ ինչ չի արել, որ մտնում է այդ դատավորների մեջ, Ռշտունին արձագանքեց. «Ես չեմ կարող ասել, բայց ինչ-որ մեկը կարո՞ղ է պատասխանել՝ դատական համակարգում ով ինչ է արել, որ մտնում է այդ 40 դատավորների մեջ»։ Բեքմեզյանը նաև հետաքրքրվեց՝ արդյո՞ք փորձել են որևէ կերպ ազդել դատավորի կողմից դատական ակտ կայացնելու վրա, ճնշելու փորձ արվել է, թե ոչ, ինչին հակառակվել է դատավորը և հիմա փորձում են նման գործողություններ իրականացնել, ինչին ի պատասխան դատավորը նշեց, որ քննադատական հայտարարություններ եղել են, բացի այդ, վարույթ է ընթացել, տեղի են ունեցել գաղտնալսումներ, որի հետ ինքն ընդհանրապես կապ չի ունեցել, որոշ ժամանակ անց դատավորներին տուժող են ճանաչել, Վազգեն Ռշտունուն ևս պետք է տուժող ճանաչվի։ Ընդ որում, դատավորն ուշադրություն հրավիրեց այն հանգամանքի վրա, որ գործը հարուցվել է դատավոր Մխիթար Պապոյանի հաղորդման հիման վրա, մինչդեռ քննությունը տարվել է դատավորների ուղղությամբ՝ գաղտնալսումներ են իրականացվել և այլն, ինչը ողջամտորեն հետևության է բերում, որ առկա է հետապնդման տարրեր։

Դատավորի ներկայացուցիչ Սիրանուշ Սահակյանն էլ նշեց, որ փաստերը հետևյալն են՝ առանց որևէ բողոքի դատավորի նկատմամբ կազմվել է մի զեկուցագիր, որը կազմվել է մեկ անձի վերաբերյալ։ Փաստաբանը ևս մեկ անգամ ընդգծեց, որ վարույթն ունի թիրախավորված բնույթ և իր համար տարակուսելի է, որ ԲԴԽ-ն փորձում է հասկանալ՝ արձակուրդի հրամանի իրավաչափության վերաբերյալ, բայց նույն ջանասիրությունը ուսումնասիրությունների վերաբերյալ չի ցուցաբերել, ինչը կասկածի տակ է դնում Խորհրդի անդամի անաչառությունը։

ՀՀ արդարադատության նախարարության ներկայացուցիչները միջնորդություն ներկայացրին՝ պահանջելով, որ դատական դեպարտամենտը տրամադրի 2021-ին Վերաքննիչ դատարանի դատավորների՝ գործերի վերամակագրման վերաբերյալ տեղեկատվություն:

«Դուք ասում եք, որ արձակուրդի հիմքով գործերի վերամակագրումը ընդունված պրակտիկա է, իսկ մեր տվյալներն էլ հակառակն են ցույց տալիս: Օբյեկտիվ պատկերը ստանալու համար դատական դեպարտամենտը կարող է ամբողջական տվյալներ տրամադրել»,- նշեց ՀՀ ԱՆ փոխնախարար Երանուհի Թումանյանցը։ ԲԴԽ-ն խորհրդակցական սենյակից վերադառնալուց հետո բավարարեց միջնորդությունը։ Դատավորի ներկայացուցիչներն էլ միջնորդություն ներկայացրեց՝ պահանջելով, որ ՀՀ արդարադատության նախարարությունը ներկայացնի կարգապահական վարույթի հիմք հանդիսացող զեկուցագրի հիմքում դրված ուսումնասիրությունները տրամադրելու վերաբերյալ, ինչը ևս բավարարվեց։

Նիստը հետաձգվեց մինչև մարտի 7-ը, ժամը՝ 12.00-ն։

Հեղինակ՝ Իզաբել Սահակյան

Աղբյուր` Փաստինֆո