Փաստ ինֆո

«Ժողովուրդ» օրաթերթը գրում է.  ՀՀ վիճակագրական կոմիտեն հրապարակել է տնտեսական վիճակը բնութագրող ընթացիկ –օպերատիվ ամփոփմամբ ստացված նախնական մակրոտնտեսական ցուցանիշները: Վիճակագրական կոմիտեի հրապարակած տվյալներով երեկ իր ֆեյսբուքյան էջում «մեծամտացել է» էկոնոմիկայի նախարար Վահան Քերոբյանը: Օրինակ, նա հրապարակել է ցուցանիշները եւ նշել՝ «Տարվա լավ սկիզբ»:

Բայց նկատենք, որ Քերոբյանը հրապարակել է միայն 2022 թվականի հունվար ամսվա ցուցանիշները 2021-ի նույն ժամանակահատվածի հետ համեմատ: Ըստ որի՝ այս հունվարին նախորդ տարվա նույն ժամանակահատվածի հետ համեմատ մեր երկրում տնտեսության ակտիվության ցուցանիշն աճել է 15.4 տոկոսով, շինարարության ծավալները՝ 3 տոկոսով, առեւտրի շրջանառությունը՝ 11.5 տոկոսով, արդյունաբերական արտադրանքի ծավալները՝ 16.6 տոկոսով: Բայց եթե դիտարկենք այս տարվա հունվար ամսվա նախորդ տարվա դեկտեմբերի համեմատ ՎԿ-ի հրապարակած տվյալները, ապա կպարզենք, որ ցուցանիշները բավականին տխուր են ու մտահոգիչ:

Օրինակ, այս տարվա հունվարին նախորդ տարվա դեկտեմբերի համեմատ ՏԱՑ-ը՝ նվազել է 45 տոկոսով, արդյունաբերական արտադրանքի ծավալները՝ 37.8 տոկոսով: Ամենակարեւորը՝ արտաքին առեւտրաշրջանառության ոլորտում լուրջ անկում ունենք գրանցած՝ 28.7 տոկոսի չափով: Միայն արտահանման ծավալները 2022 թվականի հունվարին 2021 թվականի դեկտեմբերի համեմատ պակասել են 17.9 տոկոսով, ներմուծմանը՝ 33.9 տոկոսով: Իսկ սպառողական շուկայում արձանագրված գնաճն էլ կազմել է 1.6 տոկոս: Ահա տարվա լավ սկիզբ:

Հոդվածն ամբողջությամբ կարող եք կարդալ «Ժողովուրդ» թերթի՝ 26.02.22թ համարում։

Աղբյուր` Փաստինֆո