Փաստ ինֆո

Բանակում հաճախակի ցնցումները շատ ռիսկային են, ծանր հետևանքներ կարող է ունենալ այս ամենը: «Փաստինֆո»-ի հետ զրույցում ասաց ռազմական փորձագետ Կարեն Վրթանեսյանը՝ անդրադառնալով Հայաստանի զինված ուժերում այսօր կատարված փոփոխություններին:

Նշենք, որ Գլխավոր շտաբում մի շարք պաշտոնանկություններ են արվել։ Մասնավորապես՝ Արտակ Դավթյանն ազատվել է ՀՀ ԶՈՒ ԳՇ պետի պաշտոնից, Արմեն Հարությունյանը՝ՀՀ ԶՈՒ հրթիռային զորքերի և հրետանու պետ-վարչության պետի, Անդրանիկ Մակարյանը՝ ՀՀ Զինված ուժերի պատրաստության գլխավոր վարչության պետ ՀՀ ԶՈՒ գլխավոր շտաբի պետի տեղակալի, Արթուր Պողոսյանը՝ ՀՀ զինված ուժերի բարոյահոգեբանական ապահովման վարչության պետի և Արմեն Առուշանյանը՝ ՀՀ զինված ուժերի ինժեներական զորքերի պետ-վարչության պետի պաշտոններից:

Մեզ հետ զրույցում ռազմական փորձագետ Կարեն Վրթանեսյանը նկատեց, որ շատ վտանգավոր պահին է նման փոփոխություններն արվում բանակում.

«Հաշվի առնելով ռուս-ուկրաինական ռազմական գործողությունները՝բավականին անկանոն իրավիճակ է ստեղծվել, և այս իրավիճակում նոր ցնցումներ անելը բանակում, Զինված ուժերում ռիսկային և վտանգավոր է»,-ասաց Վրթանեսյանը:

Իսկ թե ինչո՞ւ հենց այս պահին որոշվեց նման փոփոխություններ անել բանակում և ի՞նչ խնդիր է սրանով լուծում իշխանությունը, փորձագետը նկատեց․

«Հիշեցնեմ, որ այսօր լրանում է մեկ տարին ԳՇ հայտնի հայտարարության՝ Նիկոլ Փաշինյանի հրաժարականի պահանջով, հաշվի առնելով ներկայիս իշխանությունների սևեռվածությունը անձնական իշխանության վրա և նեղացկոտությունը, չի բացառվում, որ մտադրված են այս օրն ընտրել »,-ասաց նա:

Հարցին ինչի՞ կարող են հանգեցնել այսքան հաճախակի փոփոխությունները Զինված ուժերում, Կարեն Վրթանեսյանն ասաց.

«Կադրային անընդհատ փոփոխությունները և ցնցումները բերեց պատերազմում պարտության, որևէ համակարգ չի կարող աշխատել, երբ այնտեղ կադրային ցնցումներ են: Մեկ անգամ փոխեցին, երկու անգամ փոխեցին, բայց քանի՞ ՊՆ նախարար է փոխվել Հայաստանում, նրանք ե՞րբ են հասցնում ծանոթանալ իրենց աշխատանքին, եթե մի քանի ամիսը մեկ նախարարներ են փոխվում, նույնը եղել է պատերազմից առաջ ՊԲ-ում, ԳՇ-ում ԱԱԾ-ու նույնպես , դրա համար էլ այսպիսի խայտառակ վիճակ է ստեղծվել, որ պատերազմում թշնամու լրտեսական ցանցերը հանգիստ գործել են , իսկ ԱԱԾ-ն մոբիլիզացված էր ընդդիմության վրա գործել կարելու վրա, այս ամենի հետևանքն ենք տեսնում հիմա»,-ասաց նա:

Աղբյուր` Փաստինֆո