Փաստ ինֆո

Այսօր Կենդանաբանական այգու նախկին աշխատակիցները Երևանի քաղաքապետարանի դիմաց բողոքի ակցիա էին անցկացնում՝ մտահոգվելով այգում ներկայիս իրավիճակով։

«Կենդանաբանական այգում շարունակվում է կենդանիների սպանդը, ինչն ապաշնորհ կառավարման արդյունք է»,-բողոքում են ակցիայի մասնակիցները , որոնք  Երևանի կենդանաբանական այգու տարբեր տարիներին աշխատող մասնագետներն են։  

Երևանի քաղաքապետի առաջին տեղակալ Լևոն Հովհաննիսյանը ակցիայի մասնակիցների հետ զրույցում, ասաց, որ Կենդանաբանական այգու շուրջ ծագած խնդիրների մասին հայտարարությամբ հանդես կգան և կներկայացնեն հետագա քայլերը։

«Ես կարծում եմ, որ կենդանաբանական այգում կա փոփոխությունների կարիք։ Թե՛ կենդանիների պահպանության, թե՛սննդամթերքի և ընդհանուր առմամբ կառավարման ուղղությամբ պետք է ունենանք բարեփոխումներ։ Ցավոք այս խնդիրը ժառանգել ենք, ամեն ինչ անելու ենք, որ հնարավորինս շուտ այս հարցը լուծում ստանա, այն բոլոր հարցերը, որոնք հանրությանը հուզում են, մեր ուսումնասիրության կենտրոնում են»,- բողոքի ակցիայի մասնակիցների և լրագրողների հետ հանդիպնանն ասաց քաղաքապետի առաջին տեղակալ Լևոն Հովհաննիսյանը։

Ներկաների հարցերին՝ տնօրենի պաշտոնի խոստացված նոր մրցույթի, սննդամթերքի մատակարարման, կադրային վերջին փոփոխությունների մասին, քաղաքապետի տեղակալը պատասխանեց, որ այդ բոլորը մեկ շղթայի մեջ են դիտարկում։ 

Քաղաքապետի տեղակալը ակցիայի մասնակիցներին հրավիրեց քննարկման՝ առանց լրագրողների ներկայության։

«Մեզ ժամանակ է պետք։  Բոլոր հարցերը բարձրացված են, հետագայում երբ լինեն պատասխանները՝ կհայտնենք»,-նշեց քաղաքապետի տեղակալը։

Կենդանաբանական այգու նախկին աշխատողները մտահոգվեցին, որ մինչև պատասխանը լինի, բոլոր կենդանիները կսատկեն, քաղաքապետարանի պաշտոնյան արձագանքեց.

«Ամեն ինչ նորմալ է, կենդանիները չեն ստկի, ամեն ինչ մեր ուշադրության կենտրոնում է»։

Աղբյուր` Փաստինֆո