Փաստ ինֆո

Ես ամաչում եմ տեսախցիկների առջև արտահայտել որակումս այդ միջադեպին: Չխախտելով անմեղության կանխավարկածը՝ ես չեմ ցանկանում մեկնաբանել դա, բայց որպես հայ, որպես ՀՀ քաղաքացի, ես ուղղակի չեմ կարող որակումը, որը կա իմ մտքում, բարձրաձայն հնչեցնել: Այս մասին այսօր լրագրողների հետ զրույցում հայտարարեց ՊՆ փոխնախարար Արման Սարգսյանը՝ անդրադառնալով ԱԱԾ-ի կողմից լրտեսական ցանցի բացահայտմանը:

Հարցին՝ արդյո՞ք այս գործով արդյոք բարձրաստիճան զինվորականներ հարցաքննության կանչվել են, ՊՆ փոխնախարարը պատասխանեց.

«Գոյություն ունի նախաքննության մարմին, եթե դա ԱԱԾ-ի նախաքննական մարմինն է, կարող եք տեղեկատվություն ստանալ իրենցից: Հիմա եթե ես ասեմ՝ մեկին կանչել են, միգուցե որպես վկա են կանչել հարցաքննության , բայց թյուրընկալմամբ միգուցե դա վերափոխվի ու դառնա, որ նա ունի կասկածյալի կարգավիճակ: Դրա համար նախաքննությունը այդ ամենի պատասխանը կտա: Բնականաբար, կա բացթողում, սակայն այդ հարցերի պատասխանը կտա քննությունը»,-ասաց նա:

Հիշեցնենք, որ ԱԱԾ-ն հայտարարել էր, որ լրտեսական ցանց է բացահայտել.

«Գործակալական ցանցում ներգրավված ՀՀ քաղաքացիները, իրենց մասնակցությունն ունենալով քառասունչորսօրյա պատերազմին, օտարերկրյա հետախուզության առաջադրանքով մարտի դաշտից նրանց են փոխանցել ռազմական բնագավառի բազմապիսի տեղեկություններ։ Նրանք պատերազմի թեժ պահերին հակառակորդին հնարավորություն է տրվել հստակ տեղեկանալ հայկական զորքերի, զորամիավորումների, զինվորական տեխնիկայի տեսակի, թվաքանակի, նրանց հնարավոր մարտավարության՝ հարձակման, պաշտպանության, հանդիպակաց մարտի, մարտավարական վերադասավորումների և այլնի վերաբերյալ, ընդհուպ՝ քարտեզի վրա տեղորոշված եղանակով ստանալով հայկական ուժերի աշխարհագրական հստակ կոորդինատները»,-ասված է ԱԱԾ հաղորդագրությունում:

Աղբյուր` Փաստինֆո