Փաստ ինֆո

Արցախի Ասկերանի շրջանի Նախիջևանիկ համայնքի ամենալուրջ խնդիրը, ինչպես Արցախի մնացյալ բնակավայրերի դեպքում, անվտանգության խնդիրն է՝ դրանից բխող հետևանքներով։ 2020թ․ ադրբեջանական ագրեսիայի հետևանքով գյուղը ոչ միայն կորցրեց վարելահողերի ու այգիների մեկ երրորդ մասը, այլև՝ դարձավ սահմանամերձ։

«Սահմանային գիծը շատ անկանոն ձևով է անցնում։ Պատկերացրեք՝ մոտ 117 հա վարելահող երեք կողմից սահմանային է, այսինքն՝ շրջափակման մեջ է։ Այդ հողերին մոտ գնացող չկա, բնականաբար։ 117 հա հող մնում է անմշակ»,-«Փաստինֆո»-ի հետ զրույցում ասաց Նախիջևանիկի համայնքապետ Սևակ Պետրոսյանը։

Գյուղին պատկանող հողերի շուրջ մեկ երրորդ մասն էլ ադրբեջանցի զինվորների ուղիղ նշանառության տակ է, հետևաբար դրանք ևս գյուղացիները չեն կարողանում մշակել այնպես, որ նորմալ բերք ստանան։

«Գյուղատնտեսական աշխատանքները շատ դանդաղ են ընթանում։ Առանց խաղաղապահների, բացառվում է, որ գյուղտեխնիկա մտնի դաշտ։ Փետրվարի 10-ի դեպքից հետո, երբ ադրբեջանական դիրքից կրակեցին դաշտում գտնվող տրակտորի ուղղությամբ, էլ տեխնիկա չի մտնում դաշտ, եթե խաղաղապահները տեղում չեն լինում»,-նշեց համայնքապետը։

Նախիջևանիկի բնակիչներն իրենց պատկանող այգիներում մեկ-մեկ գնում աշխատում են, բայց ընդամենը մեկ-երկու ժամով։ Ինչպես Սևակ Պետրոսյանն է նկատում, այդպես հնարավոր չէ ոչ հող մշակել և ոչ էլ նորմալ բերք ստանալ։

Նրա փոխանցմամբ՝ 2020թ․ մարդիկ նոր այգիներ էին հիմնել, բայց մշակել չեն կարողացել, քանի որ այգիները սահմանային են դարձել։ Հիմա չգիտեն էլ՝ բերք կլինի, կկարողանան հավաքել, թե ոչ։

Նախիջևանիկի բնակիչներն ադրբեջանական ագրեսիայի հետևանքով կորցրել են ոչ միայն վարելահողերի մի մասը, այլև՝ 22 գլուխ խոշոր եղջերավոր անասուն։ Պետրոսյանն ասում է՝ անասունները 2021թ․ -ին են անցել ադրբեջանցիների վերահսկողության տակ անցած տարածք ու այդպես էլ չեն վերադարձել։

«Ոռոգման ջուրն էլ է սահմանով անցնում։ Հիմա այլընտրանքային ճանապարհով են փորձում ջուրը հասցնել համայնք։ Չգիտեմ՝ ոնց կստացվի»,-ասաց Սևակ Պետրոսյանը։

Ինչպես ամբողջ գյուղը, այնպես էլ երեք համայնքներին՝ Նախիջևանիկ, Վարդաձոր և Սառնաղբյուր համայնքներին ծառայող դպրոցը դիտարկվում է թշնամու դիրքից։

Նախիջևանիկի հիմնական դպրոցում սովորելու են գալիս հարևան Սառնաղբյուրի տարրականից բարձր դասարանների աշակերտները, իսկ Վարդաձորը դպրոց ընդհանրապես չունի։ Դպրոցահասակ բոլոր վարդաձորցիները Նախիջևանիկի հիմնական դպրոցում են ուսանում։

Աղբյուր` Փաստինֆո