Փաստ ինֆո

Սամվել Բաբայանի անունը շրջանառվում է պատերազմի ժամանակ տարբեր օպերացիաների նախագծման և տապալման մեջ, ու նա ներգրավվել է քննիչ հանձնաժողովի աշխատանքներին։ «Փաստինֆո»-ի հետ զրույցում նկատել է «Պատիվ ունեմ» խմբակցության պատգամավոր Տիգրան Աբրահամյանը։

Մեզ հետ զրույցում ընդդիմադիր պատգամավորն անդրադարձել է 44-օրյա քննիչ հանձնաժողովի աշխատանքներին՝ արձանագրելով, որ հանձնաժողովում ներգրավված անձինք չեն կարող ապահովել պատերազմի հանգամանքների բացահայտման անաչառությունն և օբյեկտիվությունը.

«Տեսեք՝ ովքե՞ր են մասնակցում այդ քննիչ հանձնաժողովի աշխատանքներին, մի կողմից կա իշխանություն, որն ամբողջական պատասխանատվություն է կրում 44-օրյա պատերազմի համար, դրան մասնակից են այնպիսի դեմքեր, ովքեր տարբեր կերպ առնչվել են պատերազմին՝ սկսած փորձագետներից, վերջացրած՝ արտախորհրդարանական ուժ ներկայացող Սամվել Բաբայանից, որը պատերազմի ժամանակ եղել է Արցախի ԱԽ քարտուղարը, նրա անունը շրջանառվում է տարբեր օպերացիաների նախագծման և տապալման մեջ, նա կարծես չի էլ հերքում դա: Այն մարդը, որն Արցախի պաշտոնատար անձ է եղել և երկրորդական դեմք չի եղել պատերազմում, այսօր խոսում է պատերազմում իր մասնակցության կարևորության մասին»,-ասել է Աբրահամյանը:

Հիշեցնենք, որ խորհրդարանական «Պատիվ ունեմ» և «Հայաստան» խմբակցությունները ներգրավված չեն 44-օրյա քննիչ հանձնաժողովի աշխատանքներին, փոխարենը քննիչ հանձնաժողովում են ընդգրկվել արտահերթ խորհրդարանական ընտրություններին 0.31 տոկոս ձայն հավաքած «Արդար Հայաստան» կուսակցության նախագահ Նորայր Նորիկյանը և 1.17 տոկոս հավաքած «Ազատական» կուսակցության նախագահ Սամվել Բաբայանը: Այս երկու ուժերը մաս են կազմում Փաշինյանի նախաձեռնած արտախորհրդարանական ուժերի խորհրդակցական մարմնի։ Այսինքն՝ հանձնաժողովը գործելու է առանց ընդդիմադիր վերահսկողության ։

Մանրամասները՝ տեսանյութում։

Աղբյուր` Փաստինֆո