Փաստ ինֆո

Անհրաժեշտ է երկրում վերականգնել հանրային համերաշխությունը։ Ցավոք սրտի՝ ներդրված դատապարտելի դիսկուրսների պատճառով այսօր խաթարված է հանրային համերաշխությունը։ Ցավոք, դա վերականգնելու հեռանկարները շատ մշուշոտ են։ Այս մասին աշխատանքային գործունեությունն ամփոփող ասուլիսում ասաց ՄԻՊ Արման Թաթոյանը։ 

«Դատապարտելի էր, որ հասարակական-քաղաքական հարթակ բերվեց նոր ու նախկին, սև ու սպիտակ դիսկուրսը՝ ըստ էության հասարակությանը բաժանելով խմբերի։ Սրան ավելացան դարձյալ դատապարտելի՝ «ժեխ», «զոմբիներ», «պիցցայակեր», «ծախված» պիտակավորումները։ Ստիպված եմ այս բառերն արտաբերել, որ ցույց տամ հասարակությանը պառակտող դիսկուրսները, նաև՝ սոցիալական ցանցերի կեղծ էջերի կազմակերպված արշավների միջոցով»,- նշեց Արման Թաթոյանը՝ ընդգծելով, որ սա սկզբունքորեն նպաստել է երկրում ատելության և անհանդուրժողականության մթնոլորտի աճին։

Վտանգավոր և անթույլատրելի է հայհոյանքի դիսկուրսը, որը բերվել է հանրային տիրույթ և, ՄԻՊ-ի դիտարկմամբ, պետությունն այստեղ լրջագույն անելիք ունի, մինչդեռ պետությունն ինքն էլ նպաստում է այս ամենի աճին և հետո անթույլատրելի մեթոդներով սկսում է պայքարել իր իսկ նպաստած խնդիրների դեմ։

«Օրինակ՝ ընտրությունների ժամանակ ատելությունն ու վիրավորանքը հանեցին ամենապիկին, երկու ամիս անց՝ սկսեցին քրեական օրենսդրությամբ ամենակոշտ մեթոդով պայքարել սրա դեմ։ Հիմա շատ ավելի վատ է իրավիճակը, որովհետև այդ նոր ընդունված հոդվածն ընդամենը դարձել է քաղաքական գործիչներին ու պաշտոնյաներին պաշտպանող հոդված և ընդհանրպես չի վերացրել այս հայհոյանքն ու վիրավորանքը մեր հանրային դիսկուրսից»,- նշեց ՄԻՊ-ը։

Աղբյուր` Փաստինֆո