Փաստ ինֆո

Հայաստանը պետք է օգտվի ստեղծված առիթից և ճանաչի Արցախի անկախությունը: «Փաստինֆո»-ի հետ զրույցում հայտարարեց ԱԺ ԲՀԿ խմբակցության նախկին պատգամավոր Արման Աբովյանը՝ անդրադառնալով աշխարհաքաղաքական վերջին իրադարձություններին:

Ինչպես արդեն տեղեկացրել ենք՝ Ռուսաստանը ճանաչել է Լուգանսկի ու Դոնեցկի անկախությունը։ Արման Աբովյանի գնահատմամբ՝ սա, ըստ էության, աշխարհաքաղաքական նոր սահմանների գծման ակտիվ փուլ է, որից չեն կարող զերծ մնալ Հայաստանը և Արցախը:

Ըստ նրա՝ ՌԴ այս որոշումը պետք չէ դիտարկել լոկ Ուկրաինա-Ռուսաստան հակամարտության ներքո, քանի որ սա ավելի խորքային և մասշտաբային պրոյեկտ է, որն անդրադառնալու է ողջ աշխարհի, հատկապես՝ Հարավային Կովկասի վրա:

Հարցին՝ ստեղծված աշխարհաքաղաքական բարդ իրավիճակում որո՞նք պետք է լինեն Հայաստանի քայլերը՝ Աբովյանն ընդգծեց՝ Հայաստանի շահերից բխում է ճանաչել ո՛չ միայն Դոնեցկի և Լուգանսկի անկախությունը, այլ՝ Արցախի անկախությունը.

«Հայաստանին և Արցախին չի հաջողվի խուսափել գլոբալ այս գործընթացներից: Հայաստանը այս պարագայում պետք է հստակ պաշտպանի իր շահերը, իսկ իր շահերից բխում է, որ ունենա ուժեղ դաշնակից, որը վստահում է իրեն, բացի այդ՝ առաջ տանի իր ազգային և պետական շահերը. խոսքը գնում է Արցախի անկախության ճանաչման մասին: Արցախի անկախությունը պետք է մնա և լինի Հայաստանի ամենակարևոր առաջնահերթություններից մեկը, քանի որ Արցախի անկախությունից է կախված Հայաստանի ապագան: Սա միանշանակ բխում է ստեղծված իրավիճակից »,-ասաց Աբովյանը:

Մեր դիտարկմանը՝ արդյո՞ք Հայաստանի իշխանությունների նկատմամբ Արեւմուտքից ճնշումներ չեն լինի, եթե ճանաչի Դոնեցկի և Լուգանսկի անկախությունը՝ զրուցակիցը պնդեց՝ ճնշումներ կլինեն, բայց Հայաստանը պետք է քաղի մաքսիմումը՝ իր ազգային և պետական շահերը պաշտպանելու համար:

Հարցին՝ իսկ Հայաստանի գործող իշխանությունն արդյո՞ք կկարողանա դիվանագիտական բավարար հմտություն ցուցաբերել ստեղծված իրավիճակում՝ խուսափելու մի կողմից Արևմուտքի ճնշումներից, մյուս կողմից Ռուսաստանի հետ դաշնակցային հարաբերությունները փչացնելուց, Արման Աբովյանն արձագանքեց.

«Ո՛չ, չի կարող: Հաշվի առնելով այսօրվա իշխանությունների գործողությունները՝ նրանք զուրկ են իրավիճակն ադեկվատ գնահատելուց, ադեկվատ վերլուծությունից և ադեկվատ քայլերից»,-ասաց Աբովյանը:

Նրա խոսքերով՝ ստեղծված իրավիճակում կարևոր է, որ Հայաստանի իշխանությունները հետևություններ անեն տարածաշրջանում ստեղծված իրավիճակից, հասկանան, որ տեղի է ունենում աշխարհաքաղաքական սահմանների գծում, և ի նպաստ Հայաստանի և Արցախի գործեն.

«Չի ստացվի Թուրքիայի և Ադրբեջանի հետ սիլի-բիլի անելով կամ խաղաղության դարաշրջանից խոսելով՝ խուսափել այն նեգատիվ գործընթացներից, որոնք տեղի են ունենում: Եթե դու ուզում ես պաշտպանել քո հայրենակիցներին, քո պետության շահերը, ապա պետք է գնաս հստակ քայլերի, այս պարագայում պետք ողջ ներուժը ներդնել ռազմական և տնտեսական զարգացման համար, իսկ դա հնարավոր է անել միայն ռազմական վստահելի դաշնակից ունենալով: Պետք է հասկանալ՝ ո՞ւր ենք մենք գնում, ի՞նչ է մեր պետությունն ուզում, խաղաղություն և ապագա բղավելով ո՛չ ապագա են ստանում, ո՛չ էլ խաղաղություն, ստանում ես հակառակը՝ պատերազմը և արհավիրք, քայլերի այն համակարգը, որ ես այսօր տեսնում եմ այս իշխանության կողմից հստակ դեպի դրան են տանում »,-ասաց Աբովյանը:

Աղբյուր` Փաստինֆո