Փաստ ինֆո

Վերաքննիչ քրեական դատարանի դատավոր Վազգեն Ռշտունին գտնում է՝ իր նկատմամբ կարգապահական վարույթը հարուցվել է թիրախավորված, կա խտրական մոտեցում։ Այս մասին ԲԴԽ-ում ընթացող նիստի ընթացքում ասել է ինքը՝ դատավոր Վազգեն Ռշտունին՝ ներկայացնելով իրեն կարգապահական պատասխանատվության ենթարկելու միջնորդության վերաբերյալ պատասխանը։

Հիշեցնենք, որ կարգապահական վարույթը վերաբերում է դատավորի կողմից երկարատև արձակուրդ մեկնելու հիմքով քրեական գործերը վերամակագրման հանձնելուն։ ՀՀ արդարադատության նախարարությունը դատավորի նկատմամբ կարգապահական վարույթը հարուցել է՝ սեփական նախաձեռնությամբ՝ առանց որևէ միջնորդության, բողոքի։ Նկատենք, որ կարգապահական վարույթը վերաբերում է դատավոր Վազգեն Ռշտունու վարույթում գտնվող գործերից 10-ին, որոնք վերամակագրվել են։

«Փաստինֆո»-ի թղթակցի հաղորդմամբ՝ այսօր ԲԴԽ-ում շարունակվել է միջնորդության քննությունը, որի ընթացքում դատավորի ներկայացուցիչները, ինչպես նաև՝ ԲԴԽ անդամները հարցեր են ուղղել նախարարության ներկայացուցիչներին։ Այսպես, նախարարության ներկայացուցիչները պնդում են, թե կոնկրետ դատավորների գործերի շարժ չի ուսումնասիրվել, Ռշտունու գործերից բացի ուսումնասիրվել են նաև այլ դատավորների գործեր, սակայն շարժը նկատվել է Ռշտունու գործերում։ Վերջիններս դատավորի կողմից գործերը վերամակագրման հանձնելը դիտարկում են նաև որպես արդարադատության իրականացումից հրաժարվում։ Հարցուպատասխանի ընթացքում ԲԴԽ անդամ Մեսրոպ Մակյանը խնդրեց նախարարության ներկայացուցիչներին պարզաբանել, թե որն է Վազգեն Ռշտունու դերակատարությունը շղթայում, մասնավորապես, կա դատավորի օգնական, որը կազմում է զեկուցագիր և գործը հանձնում դատարանի նախագահին և կա նախագահի պաշտոնակատար, որը վերամակագրում է գործը և կան դատավորներ, որոնք վարույթ են ընդունում գործը և, փաստացի, Ռշտունին ոչ մի տեղ որևէ մասնակցություն չի ունեցել։

«Միանգամից ուզում եմ բացառել Ձեր այն պատասխանը, որ, եթե դատավորի օգնականը գրեր դատական ակտը և այլն։ Նման բան լինել չի կարող։ Դատավորի օգնականը չի կարող դատական ակտ կազմել, նա կարող է կազմել դատական ակտի նախագիծ։ Բացի այդ՝ Քրեական դատավարության օրենսգրքով հստակ նշված է, որ դատավորը, խորհրդակցական սենյակում կազմելով դատական ակտը, ստորագրում է դրա յուրաքանչյուր էջը և անցնում է հրապարակման։ Սա էլ է բացառում այն մտայնությունը, որ դատավորը կարող է իր պատասխանատվությունը դնել այլ անձի վրա»,- նշեց Մակյանը՝ պարզաբանում խնդրելով, թե, եթե Ռշտունին վարույթի հարուցումից հետո նախարարին ներկայացներ պարզաբանում, որ ինքը որևէ բանից տեղյակ չի եղել և նշված արարքները հանձնել է իր օգնականը, դատարանի նախագահն էլ չգիտես ինչու մակագրել էր, ԱՆ-ն նման միջնորդություն կներկայացնե՞ր ԲԴԽ, ինչին ի պատասխան Երանուհի Թումանյանցը դրական արձագանքեց։ Մակյանն էլ ի պատասխան խնդրեց նկարագրել Վազգեն Ռշտունու գործողության օբյեկտիվ կողմը, սակայն, նախարարության ներկայացուցիչը պարզաբանում կամ օբյեկտիվ կողմի նկարագրություն՝ որպես այդպիսին՝ չներկայացրեց, միայն վկայակոչեց ԲԴԽ որոշումներից մեկը, որն ըստ էության ո՛չ օբյեկտիվ կողմի նկարագրություն էր, ոչ էլ՝ պարզաբանում։ Թումանյանցը նաև հայտարարեց, թե ԲԴԽ անդամի հարցերն ուղղորդված են, կողմնակալություն է, ինչին ի պատասխան Մակյանն առաջարկեց համապատասխան գործողություններ կատարել։

Այսօրվա նիստին պատասխանով հանդես եկավ նաև դատավոր Վազգեն Ռշտունին՝ նշելով, որ իր նկատմամբ կարգապահական վարույթը հարուցվել է թիրախավորված, կա խտրական մոտեցում՝ հատկապես վերջին հայտարարությունից հետո՝ «40 դատավորների» վերաբերյալ։ Դատավորի մոտ ողջամիտ կասկածներ կան՝ արդյոք ինքը մտնում է այդ 40 դատավորների մեջ, արդյո՞ք վարույթը նախօրոք պլանավորված եղել է, թե ոչ։

«Եթե կատարվեր ամփոփ ուսումնասիրություն, ապա կպարզվեր, որ 9 դատավորի կողմից համապատասխանաբար վերամակագրման է հանձնված եղել՝ 9, 15, 6, 4, 36, 2, 10, 3, 1 գործեր։ Հանձնված գործերի մեծ մասը իմ նախագահության օրոք են եղել»,- նշեց Ռշտունին՝ պարզաբանելով, որ դա ասում է, որ տպավորություն չստեղծվի, թե միայն իր գործերն է հանձնել վերամակագրման՝ արձակուրդի մեկնելու հիմքով։ Համեմատության համար Ռշտունին նշեց, որ նմանատիպ իրավիճակներում, որոնք կապված են եղել անաշխատունակության հետ՝ հանձնվել են 7 դատավորի կողմից գործեր, որոնց տևողությունը տատանվում է 7-48 օր տևողությամբ, ապա՝ ընդգծեց, որ իր կարծիքով չարդարացված չի կարելի համարել 55 օր բացակայելու հիմքով 10 գործեր հանձնելը։ Դատավորի դիտարկմամբ՝ նման դեպքեր եղել են, եթե համարել է, որ դա չի բխում ողջամիտ ժամկետներում քննության սկզբունքներից։ Ավելին, Ռշտունու կողմից վերամակագրման են հանձնվել ոչ թե 10, այլ՝ ավել գործեր։ Դատավորի համոզմամբ՝ գործերը եղել են հանձնման ենթակա, քանի որ իր բացակայության ժամանակահատվածը երկար էր և դրանք չհանձնելը կդիտվեր որպես ողջամիտ ժամկետների խախտում։ Դատավորը նաև տեղեկացրեց, որ մինչև գործերը վերամակագրման հանձնելը՝ այդ ժամանակահատվածում ինքը քննել և ավարտել է 68 գործ, ընդ որում, ինքը հիշյալ ժամանակահատվածում դատարանի նախագահն էր և պետք է քններ 25 տոկոս պակաս գործեր, իսկ տարվա կտրվածքով՝ քննել և ավարտել է 118 քրեական գործ՝ որպես նախագահող։ Հատկանշական է, որ դատավորի կայացրած որոշումներից միայն մեկն է բեկանվել։

Հեղինակ՝ Իզաբել Սահակյան

Աղբյուր` Փաստինֆո