Փաստ ինֆո

Ադրբեջանը պարբերաբար հրադադարի ռեժիմը խախտելու է առ այն պահը, քանի դեռ Ադրբեջանի և Հայաստանի միջև խաղաղության, պայմանագիր չի կնքվել, երկու երկրները չեն ճանաչել միմյանց տարածքային ամբողջականությունը, սահմանագծում և սահմանազատում չի եղել: «Փաստինֆո»-ի հետ զրույցում հայտարարեց ռազմական փորձագետ Հայկ Նահապետյանը:

Ավելին, փորձագետը չբացառեց, որ որ ռուս-ուկրաինական սահմանին սրացումներին զուգահեռ՝ Ադրբեջանը ակտիվանա և սահմանին սադրանքների թիվը կմեծացնի.

«Ադրբեջանը լարվածությունը կմեծացնի, իսկ այդ լարվածությունը գործիք է դառնալու՝ Հայաստանի վրա ճնշումներ գործադրելու համար»,-ասաց նա:

Ըստ փորձագետի՝ Ադրբեջանը, հայ-ադրբեջանական սահմանին սադրանքներ դիմելով, նաև որոշակի պայմաններ է թելադրում Ռուսաստանին.

«Ադրբեջանի նախագահը վաղը գնալու է Մոսկվա, որտեղ ՌԴ նախագահի հետ հանդիպում է ունենալու, Ադրբեջանի և Ռուսաստանի միջև համագործակցությունը պետք է խորանա, Ադրբեջանը նաև սրա համար գին է ուզում, այսինքն՝ եթե Ադրբեջանը Ռուսաստանի հետ առավել սերտացված համագործակցության անցնի, ապա նա իր կեցվածքն ավելի է կոշտացնելու Հայաստանում և Արցախում բնակվող մեր հայրենակիցների նկատմամբ»,-ասաց Հայկ Նահապետյանը:

Հիշեցնենք, որ այսօր Արցախի ՊԲ-ն հաղորդեց Ադրբեջանի կողմից հրադադարի հերթական խախտման մասին՝ նշելով, որ Ադրբեջանական զինված ուժերն անկանոն կրակ են բացել ՊԲ դիրքերի ուղղությամբ, իսկ նախորդող օրերին կրակահերթեր էին արձակել Արցախի տարբեր բնակավայրերի՝ Թաղավարդի, Խրամորթի, Կարմիր Շուկայի ուղղությամբ, որոնց հետեւանքով վնասվել են նաեւ բնակիչների տները։ Բարեբախտաբար զոհեր ու վիրավորներ չկան խաղաղ բնակիչների շրջանում։

Աղբյուր` Փաստինֆո