Փաստ ինֆո

Ադրբեջանցի երկու պատգամավորներն արդեն Երևանում են՝ «Եվրոնեստ»-ի նիստին մասնակցելու համար։ Այս մասին հայտնում են ադրբեջանական ԶԼՄ-ները։

Հիշեցնենք, որ Եվրանեստի խորհրդարանական վեհաժողովի նիստերը կայանալու են փետրվարի 21-ին և 22-ին։ Այդ կապակցությամբ մարզահամերգային համալիրի մոտ փետրվարի 22-ին նախատեսվում է բողոքի ակցիա։ ՀՅԴ երիտասարդական միությունը ևս հայատարարել է, որ միանալու է ակցիային՝ այդպես եվրոպական պատվիրակությունների ներկայացուցիչներին իրենց վրդովմունքն արտահայտելու, Ադրբեջանի և Թուրքիայի հայատյաց քաղաքականություն շարունակական դրսևորումներին չարձագանքելու, հայ գերիներին վերադարձնելու ուղղությամբ ոչ բավարար ճնշումներ գործադրելու համար:

Լրագրողների հետ զրույցում ԱԺ «Քաղաքացիական պայմանագիր» խմբակցության պատգամավոր Մարիա Կարապետյանը հաստատեց, որ իր ունեցած տեղեկություններով՝ ադրբեջանցի պատգամավորներն արդեն ժամանել են Հայաստան։

«Եկել են երկու պատգամավոր և մեկ ուղեկցող։ Որքան հիշում եմ մի պատգամավորն անկուսակցական է, մյուսը «Նոր Ադրբեջան» կառավարող ուժի անդամ է»,- ասաց Մարիա Կարապետյանը։

Հարցին՝ ադրբեջանցի պատգամավորների հետ շփումներ կլինե՞ն, Մարիա Կարապետյանը պատասխանեց. «Այն ինստիտուցիոնալ ֆորմատներում, որոնցում Հայաստանի պատգամավորները շփվում են բոլոր երկրների պատգամավորների, այդ թվում՝ ադրբեջանցի պատգամավորների հետ, երբ մեկնում եք գործուղումների, նման ֆորմատով ինստիտուցիոնալ ներկայություն, բնականաբար, այս անգամ ևս լինելու է։ Անհնար է ակնկալել հակառակը»։

Աղբյուր` Փաստինֆո