Փաստ ինֆո

Մենք այսօր բացառիկ հնարավորություն ենք ընձեռել իշխանությանը, որպեսզի համատեղ հայտարարությամբ հանդես գանք մեր պետական-ազգային շահերը պաշտպանելու համար: ԱԺ արտաքին հարցերի մշտական հանձնաժողովում Ադրբեջանի և Թուրքիայի վավերացրած «Շուշիի» հռչակագիրը դատապարտող նախագծի քննարկման ժամանակ հայտարարեց «Հայաստան» խմբակցության պատգամավոր Արմեն Ռուստամյանը:

Ընդդիմադիր պատգամավորը հայտարարեց, որ Շուշիի հռչակագիրը Հայաստանի և Արցախի դեմ ուղղված հակահայ փաստաթուղթ է, որն ամբողջությամբ վեր է հանում այն ռազմավարական նպատակները, որ թուրք-ադրբեջանական տանդեմը պետք է իրականացնի համատեղ, և Հայաստանի խորհրդարանը անպայման պետք է արձագանքի այդ հռչակագրին.

«Եթե մեր խորհրդարանը չարձագանքի դրան, թողնի միայն գործադիրի վրա, չնայած ես չեմ լսել, որ արտգործնախարարը վեր կենա ու հստակ հայտարարի, որ սա անընդունելի է մեզ համար, հակահայկական փաստաթուղթ է, և քանի դեռ նման հայտարարություն չի եղել, ողջամիտ ու հիմնավոր կասկած է առաջանում, որ մենք ուղղակի սպասարկում ենք թուրք-ադրբեջանական շահերը։ Սթափվեք, ուրիշ եզրակացություն ձեր այս քվեարկությունից չի բխում։ Դուք ուղղակի առիթ եք տալիս, որ ողջ հայությունը գա այն եզրակացությանը, որ ուղղակի սպասարկում եք թուրք-ադրբեջանական տանդեմի շահերը, ամբողջությամբ իրականացնում եք նրան նախապայմանները, պայմանները, որն արձանագրված է այդ հռչակագրով։ Դուք ընդհակառակը, այդ պայմաններին ընդառաջ եք գնում, ասում եք՝ Արցախը տեսականորեն հնարավորություն չունի Ադրբեջանի կազմից դուրս գալու, դուք ասում եք՝ Ցեղասպանության ճանաչման լոկոմոտիվը պետք է լինի Սփյուռքը, ասում եք՝ մենք սահմանային հարցերի իրավական ճշտման որևէ խնդիր չունենք Թուրքիայի հետ։ Այսքանից հետո ուղղակի ասեք, որ ձեզ համար ընդունելի է Շուշիի հռչակագիրը, վավերացրեք Շուշիի հռչակագիրը, վերջանա գնա», հավելեց Ռուստամյանը։

Աղբյուր` Փաստինֆո