Փաստ ինֆո

Օգոստոսի 25-ին ԱԺ-ում տեղի ունեցած միջադեպը կազմակերպել է Ալեն Սիմոնյանը՝ Նիկոլ Փաշինյանի հրահանգով։ Այս մասին «Փաստինֆո»-ի եթերում ասել է քաղաքական գործիչ, քաղաքագետ Ռուբեն Հակոբյանը։ 

Հիշեցնենք, որ օգոստոսի 25-ին ԱԺ նիստերի դահլիճում խուլիգանական վարքագծով աչքի էին ընկել «ՔՊ»-ական մի քանի պատգամավորներ, որոնք հայհոյել ու հարձակվել են ընդդիմադիր պատգամավորների վրա։ Ապա՝ Ալեն Սիմոնյանի հրահանգով նիստերի դահլիճ էին մուտք գործել անվտանգության աշխատողները՝ ընդդիմադիր առանձին պատգամավորների նիստերի դահլիճից հեռացնելու, իբր, կարգի բերելու համար։

«Փաստինֆո»-ի եթերում Ռուբեն Հակոբյանը նշեց, որ օգոստոսի 25-ի կազմակերպել է Սիմոնյանը՝ Նիկոլ Փաշինյանի հրահանգով, ընդ որում, դա ասում են ոչ միայն ընդդիմության ներկայացուցիչները, այլև՝ իրենց կողմնակիցները, վայրկյաններով գրում են, թե ինչու մեկ րոպե ուշացավ ՊՊԾ միջամտությունը։

«Բոլորն էլ գիտի, որ ինքն է կազմակերպել։ Տեսականորեն դրա համարժեք քայլը կլիներ, եթե մտնեին ու սենյակից դուրս շպրտեին։ Դու պետության թիվ մեկ ամբիոնի ղեկավարն ես, հրահանգում ես նման խայտառակություն իրականացնել, հետո դեմագոգիկ նստում ասում ես՝ այսպես»,- նշեց Հակոբյանը՝ հավելելով, որ թող խոսեն դիվանագիտությունից, պառլամենտական մշակույթից. «Բայց եթե իրենց միակ կապիտալը, գործիքը վիրավորանքն է, ութ հոգով մարդ ծեծելն ու զրպարտանքն է, պետք է ասել՝ տղաներ, կարող են ձեզ էլ ծեծել։ Ես 1997թ տեսել եմ, թե ինչպես է քաղաքական 75 տոկոսանոց մեծամասնությունը մի գիշերվա մեջ դարձել փոքրամասնություն՝ դուք էլ եք այդ օրն ընկնելու։ Մտածեք, որ կարող են ձեզ վրա էլ հարձակվել ու ծեծել։ Լավ չի լինի, չէ՞։ Ջահել եք դեռ, շատ բան չեք պատկերացնում։ Մտածեք, որ բումերանգ է կյանքը»։

Աղբյուր` Փաստինֆո