Փաստ ինֆո

Ռուսաստանի հարձակումը Ուկրաինայի վրա շարունակում է հավանական մնալ, իսկ հաղորդումներն այն մասին, որ որոշ ռուսական ուժեր դուրս են բերվել Ուկրաինայի հետ սահմանից, դեռ չեն հաստատվել: Այս մասին հայտարարել է ԱՄՆ նախագահ Ջո Բայդենը, հաղորդում է «Ամերիկայի ձայնը»։

«Մենք պատրաստ ենք վճռական պատասխան տալ Ուկրաինայի վրա Ռուսաստանի հարձակմանը, որը շատ հավանական է մնում»,- ասել է Բայդենը հեռուստաուղերձում Սպիտակ տնից:

Նա ընդգծել է, որ Միացյալ Նահանգները հավատարիմ է մնում իրավիճակի դիվանագիտական լուծմանը։

Բայդենը դիմել է ռուս ժողովրդին՝ զգուշացնելով, որ Ուկրաինայի դեմ ագրեսիան կարող է վերածվել «արյունալի և կործանարար պատերազմի».

«Ես դիմում եմ Ռուսաստանի քաղաքացիներին՝ դուք մեր թշնամիները չեք», - ասել է ԱՄՆ նախագահը։ «Եվ ես չեմ հավատում, որ դուք ցանկանում եք արյունալի և կործանարար պատերազմ Ուկրաինայի դեմ, մի երկրի և ժողովրդի դեմ, ում հետ դուք ունեք ընդհանուր պատմության և մշակույթի այդքան խորը կապեր»:

Բայդենը հավելել է, որ անցած շաբաթ օրը նախագահ Վլադիմիր Պուտինի հետ հեռախոսազրույցի ընթացքում նա հստակ հասկացրել է, որ ԱՄՆ-ն պատրաստ է շարունակել բարձր մակարդակի դիվանագիտական շփումները՝ պայմանավորվածությունների ձեռք բերման համար։

«Մենք պետք է դիվանագետներին հաջողության հասնելու բոլոր հնարավորություններն ընձեռենք։ Ես կարծում եմ, որ կան իրական ուղիներ՝ անվտանգության խնդիրները լուծելու համար»,- ասել է Բայդենը։

Նա նաև հավելել է, որ Ուկրաինայի մերձակայքում ավելի քան 150.000 ռուսական զորքերի տեղակայումը «փաստ է մնում», և «ներխուժումն ակնհայտորեն հավանական է մնում»։

Աղբյուր` Փաստինֆո