Փաստ ինֆո

«Կենդանաբանական այգում շատ վատ իրավիճակ է, աշխատողներին հեռացնում են աշխատանքից, բոլոր հին աշխատողները, որոնք մասնագետներ են, կամ հեռացված են, կամ էլ այնպիսի իրավիճակում են դրվում, որ իրենք են իրենց ձեռքով դիմում գրում՝ ազատվելու»,- «Փաստինֆո»-ի հետ զրույցում ասաց Երևանի կենդանաբանական այգու թռչունների բաժնի ավագ խնամող Գարեգին Խլղաթյանը։

Նրա փոխանցմամբ՝ հին աշխատակիցներից, այս պահին, մնացել են 1-2 հոգի։ «Ամեն րոպե մեզ էլ կարող են հանել»,- նշում է մասնագետը։

Ըստ Գարեգին Խլղաթյանի՝ պատճառաբանություններ չկան, նոր ղեկավարությունն ուզում է, որ իրենց մարդիկ մնան՝ կենդանաբանական այգում աշխատելու, որ շատ բան չբացահայտվի, տեղի ունեցող գործընթացների վերաբերյալ ներկայացնեն միայն իրենց համար ցանկալի պատճառաբանությունները։

«2 ղեկավար եմ փոխել, արդեն 7 տարի է այստեղ եմ աշխատում, ղեկավարները փոխվում են, բայց դա կապ չունի, քանի որ մենք աշխատում ենք այգու համար, աշխատում ենք՝ սիրելով այգին, ինձ համար նշանակություն չունի, թե ով է ղեկավարը։ Ով նորմալ ղեկավարում է, մենք ընդունում ենք, բայց եթե տեսնում ենք, որ ճիշտ չի վարվում, մասնագետների կարծիքը հաշվի չի առնվում ու կենդանիներ են սատկում, այդ ժամանակ բարձրաձայնում ենք։ Բարձրաձայնելու արդյունքում հիմա պատերազմական իրավիճակ է ստեղծվել»,- նշեց Խլղաթյանը։

Մասնագետի խոսքերով՝ կենդանիների անկման պատճառը 90 տոկոսով սովն է։ Միայն այս տարի այգին կորցրել է եղնիկ, ջայլամ, սիրամարգ, լուսան, լորիկ, յագուար։

Յագուարի անկումը չէին կարող թաքցնել, բոլորն արդեն գիտեին, բա ինչու՞ այն մնացած կենդանիների անկման մասին չեն խոսում, հարց է բարձրացնում Խլղաթյանը.

«6 անգղ է սատկել, 4-ը՝ մեկ օրում, 2-ն էլ դրանից մեկ շաբաթ առաջ։ Թաքցնում էին, մինչև վերջ պնդում էին, որ 4-ն է սատկել, բայց ես էլ այդ բաժնի ղեկավարն եմ, ես ինչպե՞ս կարող եմ չիմանալ, թե քանի հատ է սատկել»։

Գարեգին Խլղաթյանը փոխանցում է, որ արդեն 20 աշխատակցի ազատել են աշխատանքից։ Նոր աշխատակիցները ոչ մասնագետներն են, կերերի ռացիոնները ճիշտ չեն մշակում, դրա համար էլ այսքան շատ կենդանիների անկում կա այգում։ Հին աշխատակցին՝ Աննա Ասատրյանին, հանեցին աշխատանքից, նա այգու միակ մասնագետն էր, որը կարողանում էր այդ կերերի ռացիոնները ճիշտ բաժանել։

«Սխալ կառավարման հետ կապված ստորագրահավաք ենք իրականացրել, դիմել քաղաքապետարանին։ Ով ստորագրել է այդ թղթի տակ, բոլորին ազատել են աշխատանքից, մնացել ենք ես ու մեկ հոգի»,-պատմում է Խլղաթյանը։

Փետրվարի սկզբներին Կենդանաբանական այգու տնօրենի ժամանակավոր պաշտոնակատար Արեւիկ Մկրտչյանը հայտարարեց, որ կենդանաբանական այգու սմբակավորների բաժնում՝ ուղտի և թուրքմենական կուլանների ազատավանդակում՝ ջրավազանի մոտ առնետի թույն է հայտնաբերվել։ Խլղաթյանը 100 տոկոսով վստահ է, որ նոր ղեկավարների կողմից սարքված պատմություն է։ Նա պնդում է, որ հնարավոր չէր խելացի մարդը պոլիէթիլային տոպրակով բերեր այնտեղ դներ, որ ղեկավարությունն էլ գտներ ու շատ արագ նկարեր։

Դա հատուկ իրականացրել են՝ գցելով հին անձնակազմի վրա։

«Հին աշխատողներից ոչ ոք երբեք իրեն թույլ չէր տա նույնիսկ մեկ կենդանու մազը ծռել, բոլորը սրտացավ, իրենց երեխաների պես պահել են կենդանիներին, ինչպե՞ս իրենց թույլ կտան սատկեցնել, դա անհնարին է»,- նեղսրտում է Գարեգին Խլղաթյանը։ «Փաստինֆո»-ն հետաքրքրվեց, թե արդյո՞ք Արևիկ Մկրտչյանը, հին աշխատող լինելով, չի ճանաչում իր նախկին գործընկերներին՝ հին աշխատողներին, մասնագետը պատասխանեց, որ Ճանաչում է՝ ավելացնելով.

«Երևի նպատակ կա այգու հետ կապված, հավանաբար ուզում են այգին ինչ-որ ձևով դատարկեն կամ չգիտեմ ինչ անեն, քանի որ այն մարդը, որն ուզում է այգին «ծաղկի», հին մասնագետներին երբեք չի հեռացնի, որոնք այսքան տարի սրտացավ պահել են այգին։ Մասնագետ բժշկին՝ Հարություն Հովհաննիսյանին, հեռացրեցին, դրա համար էլ այսքան կենդանի է սատկում, որովհետև ոչ մի մասնագիտական մոտեցում չկա, նորմալ բժիշկ չունենք»,-նշեց Խլղաթյանը։

Արդյո՞ք սա Արևիկ Մկրտչյանի խնդիրն է, գուցե հրահանգվա՞ծ է՝ հարցին մասնագետն ասաց, որ տեղյակ չէ, բայց մի բան պարզ գիտի՝ նոր ղեկավարը փողոցից մարդկանց է բերել. «Շուն պահողներին բերել են այգում որպես մասնագետներ, իսկ հին աշխատողներին, որոնք բազմազավակ էին, ունեին ուսանողներ, զրկել է հացից»,-նշեց զրուցակիցը։

Կենդանաբանական այգու գլխավոր կենդանաբույծ, կերակրման մասնագետ Աննա Ասատրյանը, որը 14 տարի աշխատել է այգում, «Փաստինֆո»-ին հայտնեց, որ իր դիմումի համաձայն փետրվարի 4-ից ազատվել է աշխատանքից։

«Վերաբերմունքը, կասկածանքները, շարունակաբար մեղադրանքները՝ սխալ աշխատելու մեջ, անհնարին էր դարձրել աշխատանքը, նման մթնոլորտում արդեն տհաճ էր։ Հունվարի 5-ին դիմում գրեցի, ղեկավարն ասաց, որ դեռ մեկ ամիս պետք է մնամ աշխատանքի»։

Աննա Ասատրյանի դիմումին առարկում չի եղել, իրավիճակի շտկման ոչ մի արձագանք։ Մասնագետը նշում է, որ փոխարենն ավելի է սրվել դրությունը, պայմանները։

Մասնավորապես՝ մասնագետին թույլ չեն տվել մտնել կերախոհանոց՝ կերերը բաց թողնելու համար։

«Եթե պատճառաբանությունն իմ սխալ աշխատանքն է, ապա 14 տարվա իմ աշխատանքային գործունեության մեջ կենդանիների շատ անկումներ կունենայինք»։

Նրա խոսքով՝ այսքան կարճ ժամանակահատվածում նման թվով կենդանիների անկում չի եղել, հատկապես, որ անգղները շատ բարձր իմունիտետ ունեցող թռչուններ են, նրանք ձագեր են բերել. «Սա սենսացիա է, ամեն այգի ձագ չի տալիս, սա նշանակում է, որ մենք լավ ենք խնամել, ճիշտ ենք կերակրել»,-ասում է մասնագետը։

Բարձրացված հարցերի վերաբերյալ «Փաստինֆո»-ն փորձել է ստանալ նաեւ Կենդանաբանական այգու տնօրինության մեկնաբանությունը, սակայն հեռախոսազանգերը մնացին անպատասխան։

Աղբյուր` Փաստինֆո