Փաստ ինֆո

Երևանի ընդհանուր իրավասության դատարանում՝ դատավոր Տաթևիկ Ստեփանյանի նախագահությամբ, այսօր կայացել է Դավթաշենի նախկին թաղապետ, այժմ՝ «ՔՊ»-ական պատգամավոր Միքայել Թումասյանն ընդդեմ «Հայրենիք» կուսակցության անդամ Արսեն Նիկողոսյանի գործով նախնական դատական նիստը։

Հիշեցնենք, որ Դավթաշենի նախկին թաղապետ Միքայել Թումասյանը հայցադիմում է ներկայացրել՝ ընդդեմ Արսեն Նիկողոսյանի՝ վնասի փոխհատուցման պահանջի մասին։ Հայցադիմում ներկայացնելու պատճառը եղել է ապօրինի շինությունների քանդման վերաբերյալ Արսեն Նիկողոսյանի ֆեյսբուքյան գրառումը։ Մասնավորապես, Նիկողոսյանը, անդրադառնալով քանդման գործընթացներին, գրել է, որ նույն ժամանակահատվածում, երբ կոտրում են հասարակ քաղաքացիների շենքերը, շինությունները, տեղի է ունենում մի շինարարություն, որն ըստ իր տվյալների՝ իրականացնում է Դավթաշենի թաղապետը։ Դրանից հետո Նիկողոսյանը քննադատական խոսքեր ուղղել իշխանություններին, անդրադարձել Երևանի նախկին քաղաքապետ Հայկ Մարությանին։ Միքայել Թումասյանը նշվածը համարում է զրպարտություն և հայցադիմում է ներկայացրել դատարան։ Ըստ հայցվորի՝ զրպարտություն է հանդիսանում «Միքայել Թումասյանը այս պահին իրականացնում է շինարարություն» նախադասությունը, որը արատավորում է իր պատիվն ու արժանապատվությունը։

Այսօր կայացել է նախնական դատական նիստ, որի ընթացքում հստակեցվել է հայցի հիմքը, առարկան, ինչպես նաև՝ պատասխանող կողմը ներկայացրել է առարկությունները։

Պատասխանող կողմից ներկայացուցիչ, փաստաբան Անահիտ Սարգսյանը «Փաստինֆո»-ի հետ զրույցում, ներկայացնելով պատասխանի հիմքերը, նշեց, որ գրառումն իրենից հանրային գերակա շահ է ներկայացնում, այսինքն, այն տեղեկատվությունն է, որը հետաքրքրում էր հասարակությանը և հասարակությունը պետք է տեղեկացված լինի նման հարցերի վերաբերյալ, Նիկողոսյանն էլ՝ որպես ընդդիմադիր գործիչ, իրավունք ունի հանրության հետաքրքրող հարցերի վերաբերյալ դիրքորոշում հայտնել, քննադատել և այլն։ Ըստ պատասխանող կողմի՝ «Միքայել Թումասյանն այս պահին իրականացնում է շինարարություն» արտահայտությունը որևէ կերպ չի կարող համարվել զրպարտություն, որովհետև զրպարտությունն այն փաստացի տվյալներն են, որոնք սուտ են, չեն համապատասխանում իրականությանը և արատավորում են հայցվորի պատիվն ու արժանապատվությունը։

«Ենթադրենք՝ Միքայել Թումասյանը չի իրականացնում շինարարություն կամ իրականացնում է։ Արդյո՞ք շինարարություն իրականացնելը կարող է արատավորել անձի պատիվը կամ արժանապատվությունը կամ նսեմացնել նրան հասարակության աչքում»,- նշեց Անահիտ Սարգսյանը։

Պատասխանող կողմը նաև հիշեցնում է, որ հանրային, քաղաքական գործիչները պետք է հանդուրժող լինեն քննադատությունների հանդեպ, նաև՝ այն խոսքի հանդեպ, որը կարող է բարեհաճությամբ չընդունվել, ինչպես ԵԴ-ն է նշում, կարող է նաև ցնցել, անհանգստացնել, երբեմն՝ վիրավորական թվալ։ Բացի այդ՝ ՍԴ-ն, ելնելով նաև ՄԻԵԴ նախադեպերից, գտնում է, որ զրպարտության, վիրավորանքի դեպքում պետք է լինի դիտավորություն, այսինքն՝ գրառումը կատարվել է անձին՝ հասարակության աչքին նսեմացնելու համար, մինչդեռ, այս պարագայում ընդամենը նախադասություն է, որ Միքայել Թումասյանն իրականացնում է շինարարություն։

«Ակնհայտ է, որ այստեղ նսեմացնելու, արատավորելու դիտավորություն չկա։ Ամբողջ գրառումը քննադատական խոսք էր՝ ուղղված իշխանությանը և քաղաքապետին, տեսանք, որ այդ քաղաքապետին հենց իշխանությունը հեռացրեց՝ կրկին քննադատելով նրան»,- նշեց Անահիտ Սարգսյանը։

Դատական նիստը հետաձգվել է, քանի որ պատասխանող կողմը, հնարավոր է, լրացնի առարկությունները։ Դրանից հետո դատարանը կբաշխի ապացույցման բեռը։ Հաջորդ դատական նիստը նշանակվել է ապրիլի 12-ին։

Հեղինակ՝ Իզաբել Սահակյան

Աղբյուր` Փաստինֆո