Փաստ ինֆո

44-օրյա պատերազմը քննող հանձնաժողովի աշխատանքներին չմասնակցելու և նախագահի թեկնածու չառաջադրելու մասին որոշումները «Հայաստան» խմբակցությունը կայացրել է քննարկումների արդյունքում՝ բացարձակ մեծամասնության համաձայնությամբ։ Այս մասին «Փաստինֆո»-ին ասել է «Հայաստան» խմբակցության պատգամավոր Վահե Հակոբյանը՝ նշելով. «Մեզ մոտ որոշումները անհատները չեն կայացնում, այլ ընդունվում են համատեղ քննարկումից հետո: Եթե խմբակցությունը մի որոշում ընդունում է, ուրեմն առնվազն մեծամասնությունը համաձայն է դրա հետ , կոնկրետ այս դեպքում բացարձակ մեծամասնությունն է համաձայնվել՝ չմասնակցելու հետ»:

Վահե Հակոբյանը վստահեցրեց, որ որոշումների մասով խմբակցությունում տարաձայնություններ չեն եղել, մեկ միասնական որոշում է կայացվել։

«Մենք երկու մասով էլ հանդես ենք եկել հայտարարությամբ, և շատ հանգամանորեն բացատրել ենք պատճառները: Իմաստը ո՞րն է քննիչ հանձնաժողով գնալու, մենք այլ ձևաչափ էինք առաջարկել, որ ընդդիմությունն ունենա հավասար լիազորություններ քննիչ հանձնաժողովում, որպեսզի կարողանանք ազդել ողջ գործընթացի և վերջնական որոշման վրա, բայց իշխող ուժը մերժեց դա, առաջ քաշեց իր օրակարգը, որով իրենք են դոմինանտ լինելու հանձնաժողովում ու իրենք իրենց մաքրելու են։ Տրամաբանությունը ո՞րն է, որ մենք մասնակից լինեինք այդ ինքնամաքրմանը»,-ասաց ընդդիմադիր պատգամավորը:

Դիտարկմանը, որ կարևոր հարցերում ընդդիմության պասիվությունը և ձեռնպահ մնալը թուլացնում է դիրքերը, ինչպես նաև հասարակության մեծ մասի հիասթափությունն է առաջացնում՝ հաշվի առնելով, որ հասարակությունը հատկապես այս ընդդիմությունից այլ ակնկալիքներ ուներ՝ Վահե Հակոբյանն արձագանքեց «Ես չեմ կարծում եմ, որ մեր դիրքերը թուլանում են, համաձայն էլ չեմ, որ ոչ մի գործընթացի չենք մասնակցում։

Մենք կարող ենք մի բան ֆիքսել, որի հետ կարող եմ համաձայնվել՝ քանի Նիկոլ Փաշինյանը զբաղեցնում է երկրի ղեկավարի աթոռը, ուրեմն մենք ինչ-որ կիսատ բան ենք արել,նույնն էլ հանրությունը, այսօր փողոցում ում հարցնում ես, գրեթե բոլորը կոպիտ բառերով են արտահայտվում Նիկոլ Փաշինյանի և նրա խմբակցության հասցեին, բայց փողոց դուրս չեն գալիս»,-ասաց նա:

Արձագանքելով իշխանական պատգամավորներին, որոնք երեկ մեղադրում էին ընդդիմությանը՝ պատերազմի քննիչ հանձնաժողովի աշխատանքներին չմասնակցելու համար, ինչպես նաև հայտարարում, թե ընդդիմադիր պատգամավորների փոխարեն այլ մարդիկ են որոշումներ կայացնում՝ նկատի ունենալով Ռոբերտ Քոչարյանին, Վահե Հակոբյանն ասաց.

«Իշխող պատգամավորների հայտարարությունները ծիծաղելի են, նրանք ինչ-որ բան պետք է ասեին, իրենց որդեգրած քաղաքականությունն էլ սուտ և կեղծիք տարածելն է, նման քայլերով փորձում են ապակողմնորոշել հանրությանը:

Ռոբերտ Քոչարյանը մեր թիմի ղեկավարն է, ինքը կարծիք է արտահայտում, մենք ունենք խորհուրդ որտեղ բոլորի կարծիքը դրվում է մեկ սեղանի և խորհուրդն է կայացնում որոշում, խմբակցությունը համատեղ է որոշում կայացնում »,-ասաց Վահե Հակոբյանը:

Աղբյուր` Փաստինֆո