Փաստ ինֆո

Շարունակաբար կրկնվող կարանտինային ռեժիմով պայմանավորված տարբեր հիվանդություններ ունեցող մարդիկ բաց են թողել ճիշտ ժամանակին հետազոտվելու հնարավորությունը։ Այս մասին,- «Փաստինֆո»-ի հետ զրույցում ասաց «Իրա Մեդիքլ» կենտրոնի ճառագայթային ուռուցքաբան, ռադիոթերավևտ Միքայել Առուստամյանը։
Այսօր՝ փետրվարի 15-ը, մանկական քաղցկեղի դեմ պայքարի միջազգային օրն է, իսկ օրեր առաջ՝ փետրվարի 4-ին նշվեց ընդհանրապես քաղցկեղի դեմ պայքարի միջազգային օրը։

Միքայել Առուստամյանը «Փաստինֆո»-ի հետ զրույցում նկատել է, որ, ցավոք, մեզանում նորից նկատվում է հիվանդության ուշ հայտնաբերման աճի միտում։

«2021 թվականի քաղցկեղ հիվանդության հայտնաբերման և հիվանդությունից մահացության տվյալները դեռ ամփոփված չեն, բայց Առողջապահության ազգային ինտիտուտի տվյալներով 2020 թ-ին քաղցկեղից մահվան ելքն ավելի պակաս է եղել, քան 2019-ին»,- ասել է բժիշկն ու ավելացրել. «Մի բան կարող եմ նշել, որ 2020-2021թթ ընթացքում կորոնավիրուսի համավարակով պայմանավորված բնակչությունն ավելի սակավ սկսեց հետազոտվել: Միայն քաղցկեղի մասին չեմ ասում, նաև այլ հիվանդությունների դեպքում վերջին 2 տարում պրոֆիլակտիկ զննումներն ըստ գրաֆիկի չեն կատարվել: Տոկոսային այդ հարաբերությունը նորից դեպի վատացում է գնում, այսինքն՝ ուշ հայտնաբերման, ուշ դիմելիության դեպքերը նորից շատացել են»։

Ստացվում է, որ շարունակաբար կրկնվող կարանտինային ռեժիմով պայմանավորված մարդիկ բաց են թողել ճիշտ ժամանակին հետազոտվելու հնարավորությունը՞՝ «Փաստինֆո»-ի հարցին ի պատասխան բժիշկը հաստատեց, որ այո, չեն պահպանվել հետազոտության գնալու ժամկետները, և ուշ դիմելիության պատճառով հիվանդության, այս դեպքում քաղցկեղի, ուշ փուլերում հայտնաբերման թվերը շատացել են:

«Հանրապետությունում արձանագրված կորոնավիրուսով պայմանավորված իրավիճակում մեզ մոտ նույնպես, եթե համեմատենք նախորդ տարիների հետ, հիվանդությունը ուշ փուլերում հայտնաբերելու տոկոսային հարաբերությունը շատացել է վերջին 2 տարվա ընթացքում, բայց մինչ այդ՝ տարեց տարի մենք տեսնում էինք հիվանդության վաղ հայտնաբերման փուլերի լավ ցուցանիշ»,- ասում է ռադիոթերավևտը:

«Փաստինֆո»-ին Ոռուցքաբանության ազգային ինստիտուտից փոխանցեցին, որ քաղցկեղով մահացության ելքի 2021թ-ի տվյալները դեռ ամփոփված չեն, սակայն փոխանցեցին 2018-ից 2020 թթ առաջին անգամ ախտորոշում անցած և նորագոյացություններից մահացությունների ցուցանիշները։

2018թ. առաջին անգամ ախտորոշվել է 8672 քաղցկեղով հիվանդ, 2019-ին՝ 7908 մարդ, 2020-ին՝ 6931 մարդ։

2018թ. նորագոյացություններից մահացել է 5258/20%/ մարդ, 2019-ին՝ 5485/21%/ մարդ, 2020-ին՝ 5420/15%/ մարդ։

Այս չարաբաստիկ հիվանդությունը, ցավոք, չի շրջանցում նաեւ երեխաներին. մինչև 14 տարեկան երեխաների շրջանում առաջին անգամ հաստատված ախտորոշումով և ուռուցքաբանական հիմնարկներում գրանցված չարորակ նորագոյացություններով պացիենտների թիվը մեր երկրում 2019 թվականին կազմել է 12.8 դեպք՝ 100 հազար բնակչի հաշվով, 15-17 տարեկանների շրջանում` 11.8 դեպք, իսկ 2020 թվականին մինչև 14 տարեկան երեխաների շրջանում` 10.0 դեպք և 15-17 տարեկանների շրջանում` 9.4 դեպք: Դեպքերի շուրջ 40%-ը լեյկեմիաներն են։

Աղբյուր` Փաստինֆո