Փաստ ինֆո

ՀՀ երկրորդ նախագահ Ռոբերտ Քոչարյանի և նրա պաշտպանների համար պարզ չէ մեղադրանքը։ Այս մասին դատական նիստին հայտարարեց պաշտպան Հայկ Ալումյանը՝ մեղադրական եզրակացության հրապարակումից հետո։ 

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, մեկնարկել է Ռոբերտ Քոչարյանի և Արմեն Գևորգյանի գործով դատաքննությունը։ Թեև Ռոբերտ Քոչարյանի պաշտպանները հայտնեցին, որ ունեն միջնորդություն, սակայն նախագահող դատավորը նշեց, որ գործը գտնվում է դատաքննության փուլում, միջնորդությունը կլսեն դատական նիստի ընթացքում՝ մեղադրական եզրակացության հրապարակվելուց հետո։

Մեղադրող դատախազ Պետրոս Պետրոսյանը հրապարակեց մեղադրական եզրակացությունը, համաձայն որի՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։ Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Նախքան ամբաստանյալներին հարցեր ուղղելը նախագահող դատավոր Աննա Դանիբեկյանը պարզաբանեց, որ վերջիններս կաշկանդված չեն նախաքննության ընթացքում մեղքն ընդունելու կամ չընդունելու վերաբերյալ արված հայտարարություններով, պարտավոր չեն պատասխանել առաջադրված հարցերին և հարցերի պատասխաններից հրաժարվելը չի կարող մեկնաբանվել ի վնաս իրենց։ Նախագահողը պարզաբանեց, որ Քոչարյանին մեղսագրվող հոդվածը նախատեսում է պատասխանատվություն՝ առանձնապես խոշոր չափերով կաշառք ստանալու համար, որպես պատիժ նախատեսում է ազատազրկում՝ 7-12 տարի ժամկետով՝ գույքի բռնագրավմամբ կամ առանց դրա։
Ռոբերտ Քոչարյանի պաշտպան Հայկ Ալումյանը հայտարարեց, որ մեղադրանքը պարզ չէ իր պաշտպանյալի և պաշտպանական խմբի համար, ուստի 20 րոպե ընդմիջում խնդրեց, որպեսզի ցույց տան, թե մեղադրանքի կոնկրետ որ դրույթները պարզ չեն։ Ալումյանը համոզմունք հայտնեց, որ դատարանը նույնպես կգա այդ եզրակացության։

«Համոզված եմ, որ մեղադրանքը նույնիսկ պարզ չէ այն քննիչին, ում թելադրել են սա», - ասաց պաշտպանը։
Դատարանը 20 րոպեանոց ընդմիջում հայտարարեց, որպեսզի պաշտպանները կարողանան ներկայացնել մեղադրանքում առկա անհստակությունների հետ կապված իրենց հարցերը։

Հեղինակ՝ Իզաբել Սահակյան

Աղբյուր` Փաստինֆո