Փաստ ինֆո

ՀՀ արդարադատության նախարարությունը Վերաքննիչ քրեական դատարանի դատավոր Վազգեն Ռշտունու նկատմամբ կարգապահական վարույթ է հարուցել սեփական նախաձեռնությամբ՝ ուսումնասիրությունների զեկուցագրի հիման վրա, սակայն չի հստակեցնում՝ ինչու են ուսումնասիրել հենց դատավոր Ռշտունու դատական ակտերը։ Այդպիսով, ըստ էության, սեփական լռությամբ հաստատելով, որ դատավորի նկատմամբ վարույթը հարուցել են թիրախավորված, ցուցաբերվել է խտրական մոտեցում։

Հիշեցնենք, որ կարգապահական վարույթը վերաբերում է դատավորի կողմից երկարատև արձակուրդ մեկնելու հիմքով քրեական գործերը վերամակագրման հանձնելուն։ ՀՀ արդարադատության նախարարությունը դատավորի նկատմամբ կարգապահական վարույթը հարուցել է՝ սեփական նախաձեռնությամբ՝ առանց որևէ միջնորդության, բողոքի։

«Փաստինֆո»-ի թղթակցի հաղորդմամբ՝ ԲԴԽ-ում այսօր կայացած նիստի ընթացքում ՀՀ արդարադատության նախարարի խորհրդական Գագիկ Հարությունյանը ներկայացրեց միջնորդությունը՝ հայտարարելով, թե դատավորն իրավասու չէ կատարել արդեն իսկ մակագրված դատական գործի վերաբաշխում։

Նկատենք, որ կարգապահական վարույթը վերաբերում է դատավոր Վազգեն Ռշտունու վարույթում գտնվող գործերից 10-ին, որոնք վերամակագրվել են, նախարարության ներկայացուցիչները հայտարարել են, թե ևս 60 գործերի վերաբերյալ կասկածներ ունեին, սակայն դրանք այնքան էլ հիմնավոր չեն, որ դրվեին միջնորդության հիմքում։ Հարությունյանը կարծում է, թե դատավոր Ռշտունին կարգապահական խախտում է կատարել դիտավորությամբ։ Վերջինիս խոսքով՝ խոսքը ոչ թե մեկ գործի, այլ՝ 10 գործերի մասին է։

ՀՀ արդարադատության նախարարության ներկայացուցչին հարցեր ուղղեցին դատավոր Վազգեն Ռշտունին և նրա ներկայացուցիչները, սակայն, դրանց հոդաբաշխ որևէ պատասխան այդպես էլ չտրվեց։ Մասնավորապես, դատավորը և ներկայացուցիչները փորձեցին պարզել, թե ինչն է հիմք հանդիսացել ուսումնասիրություններ կատարելու համար, որի հիման վրա էլ համապատասխան զեկուցագիր է ներկայացվել, ու հիմք դարձել կարգապահական վարույթի հարուցման համար։

Նախարարության ներկայացուցիչները փորձեցին «խուսանավել»՝ նախ պարզաբանում պահանջելով, թե ինչ կապ ունի դա բուն միջնորդության հետ, ապա՝ պարզապես չպատասխանելով հարցերին։ Դատավորի ներկայացուցիչ Սիրանուշ Սահակյանն էլ պարզաբանեց, որ դատարանների նկատմամբ ընդհանուր վերահսկողությունն այլևս հերքված գաղափարախոսություն և իրողություն է, արդարադատության նախարարը բացարձակ ձևով չի կարող վարույթ հարուցել։ Կարգապահական վարույթ կարող է հարուցվել օրինական առիթի հիման վրա, պետք է առնվազն բողոք լինի, սակայն բողոքող անձ սույն դեպքում չի եղել, ավելին, ողջամիտ ժամկետներում ողջամիտ քննության անհրաժեշտության վերաբերյալ մի շարք բողոքներ են ներկայացվել ՀՀ արդարադատության նախարարություն, որոնք անպատասխան են մնացել։ Ռուբեն Մելիքյանն էլ նկատեց՝ դա սկզբունքային նշանակության հարց է, ոչ իրավաչափ հիմքից հնարավոր չէ ստանալ իրավաչափ հետևանք, թունավոր ծառի պտուղները նույնպես թունավոր են։ Մելիքյանի «կենցաղային» լեզվով պարզաբանումից հետո նախարարության ներկայացուցիչն արձագանքեց՝ կրկին նշելով, որ վարույթի հարուցման առիթ է հանդիսացել զեկուցագիրը, ինքնուրույն հայտնաբերումը, ոչ թե՝ բողոքը, բողոք չպետք է առկա լիներ։

Վարույթի հարուցման հիմքի իրավաչափության, մասնավորապես, ուսումնասիրությունների վերաբերյալ այլ հարցադրումներին նախարարության ներկայացուցիչները հոդաբաշխ բացատրություն չտվեցին, ասելիք չունեին, որոշեցին պնդել, թե այդ հարցերը կապ չունեն միջնորդության հետ։

Սիրանուշ Սահակյանը նաև հետաքրքրվեց՝ նմանատիպ ի՞նչ ուսումնասիրություններ է կատարել ԱՆ-ն 2021-2022թ., սակայն նախարարության ներկայացուցիչը հրաժարվեց հարցին պատասխանելուց։ Դատավոր Վազգեն Ռշտունին էլ պնդեց, որ ուսումնասիրությունները տրամադրվեն իր ներկայացուցիչներին։

«Արվել է ամփոփ ուսումնասիրություն, որի արդյունքում նշվել է, որ Վազգեն Ռշտունին հանձնել է 10 քրեական գործ։ Այդ ամփոփ ուսումնասիրությունը, որը զեկուցագրի հիմք է հանդիսացել, ուզում ենք իմանալ՝ խտրական մոտեցում եղե՞լ է, թե՞ ոչ. միգուցե ավելի շատ գործեր են հանձնվել։ Ես ունեմ տվյալներ, որոնք կներկայացնեմ այն մասին, որ մոտեցումը եղել է խտրական, քանի որ Ռշտունուց բացի այլ քրեական գործեր էլ են եղել ու ավելի շատ»,- ընդգծեց Վազգեն Ռշտունին։

Այն բանից հետո, երբ ՀՀ ԱՆ նորանշանակ փոխնախարար Գրիգորի Մինասյանը հայտարարեց, թե պարզապես նախարարությունն է սկսել ավելի լավ աշխատել, առաջիկայում կտեսնենք նման ուսումնասիրությունների արդյունքներ՝ Վազգեն Ռշտունին հայտարարեց, որ տվյալներ կներկայացնի, որ իր նկատմամբ մոտեցումը եղել է խտրական։

Ռուբեն Մելիքյանն էլ ավելացրեց՝ անուններ պետք չէ տալ, թիվ ասեն՝ քանի՞ հոգու վերաբերյալ է նման ուսումնասիրություն կատարվել ու դրա արդյունքներով քանի՞ հոգու նկատմամբ է կարգապահական վարույթ հարուցվել:

Միջնորդության քննությունն անցավ լարված մթնոլորտում, նույնիսկ նախագահող Գագիկ Ջհանգիրյանը ստիպված ընդմիջում հայտարարեց, իսկ նիստի վերսկսումից հետո կարճ տևեց։

Միջնորդության քննությունը հետաձգվեց։ Հաջորդ նիստը նշանակվել է փետրվարի 24-ին, ժամը՝ 15.00-ին։

Հեղինակ՝ Իզաբել Սահակյան

Աղբյուր` Փաստինֆո