Փաստ ինֆո

Ազգային ժողովում այսօր կայացել է 44–օրյա պատերազմի հանգամանքներն ուսումնասիրող ԱԺ քննիչ հանձնաժողովի առաջին նիստը: Նիստը վարում էր ԱԺ պաշտպանության, ազգային անվտանգության հարցերի մշտական հանձնաժողովի նախագահ Անդրանիկ Քոչարյանը:

«Հայաստան» և «Պատիվ ունեմ» խմբակցությունները ավելի հայտարարել էին, որ չեն մասնակցելու քննիչ հանձնաժողովի աշխատանքներին:

Այսօրվա նիստին ներկա էին «Պատիվ ունեմ» խմբակցության պատգամավոր Տիգրան Աբրահամյանը, «Հայաստան» խմբակցության պատգամավորներ Գեղամ Մանուկյանը և Գեղամ Նազարյանը:

Ընդդիմադիրները կրկին պնդեցին՝ որ գործող իշխանության օրոք պատերազմի օբյեկտիվ քննություն չի կարող լինել.

«Իշխանությունը մի կողմից հայտարարում է, որ ստեղծված իրավիճակի պատասխանատուն և առաջին մեղավորն ինքն է, այս պայմաններում նրա մասնակցությամբ այս հանձնաժողովի աշխատանքների իրականացումը չի կարող օբյեկտիվ լինել: 44-օրյա պատերազմի հանգամանքների բացահայտումը և հանրությանը ներկայացնելը շարունակում է մնալ մեր առաջնահերթություններից մեկը, բայց մենք համարում ենք, որ այդ աշխատանքնմերը պետք է իրականացվեն այն ժամանակ, երբ գործող իշխանությունն այլևս չլինի իշխանության: Այն իշխանությունը, որն ունի պատասխանատվությունը, որի օրոք տեղի է ունցել այդ իրադարձությունները, նրա գլխավորությամբ իրականացվող աշխատանքը չի կարող ունենալ օբյեկտիվություն»,-ասաց Տիգրան Աբրահամյանը:

«Հայաստան» խմբակցության պատգամավոր Գեղամ Նազարյաննն էլ նշեց, որ թեև ընդդիմադիր խմբակցությունները հայտարարել են, որ չեն մասնակցելու քննիչ հանձնաժողովի աշխատանքներին, բայց իրենք միևնույն ժամանակ հանդիսանում են ԱԺ անվտանգության և պաշտպանության հանձնաժողովի անդամ, ուստի օրենքի ուժով հանդիսանում են նաև քննիչ հանձնաժողովի անդամ.

«Մենք ազատ ենք որոշելու մեր մասնակցության ձևաչափը: Այնպես չէ, որ մենք մի կողմ ենք քաշվում և մամուլից ենք տեղեկանալու՝ ինչպե՞ս է ընթանում աշխատանքները»,-ասաց Նազարյանը:

«Հայաստան» խմբակցությունից Գեղամ Մանուկյանն էլ նկատեց, որ օբյեկտիվ քննություն հնարավոր է, երբ քննիչ հանձնաժողովի մեծամասնությունը չի պատկանում այն քաղաքական ուժին, որի իշխանության օրոք սանձազերծվել է պատերազմ։

Ընդդիմադիրները լքեցին 44-օրյա պատերազմի հանգամանքներն ուսումնասիրող հանձնաժողովի նիստը.

«Մենք հիմա լքում ենք դահլիճը և եթե մի օր նպատակահարմար գտնենք, կարող է գանք և մասնակցենք նիստին»,–ասաց Գեղամ Մանուկյանը, ընդդիմադիր պատգամավորները դուրս եկան նիստերի դահլիճից:

Պաշտպանության ու անվտանգտության հանձնաժողովի նախագահ Անդրանիկ Քոչարյանն էլ հայտարարեց, թե ընդդիմությունն ասելու բան չունի, այդ պատճառով էլ հրաժարվում են մասնակցել հանձնաժողովի աշխատանքներին.

«Եկան, գլուխները կախ գնացին։ Ով, ով, բայց Գեղամ Նազարյանը պետք է մասնակցեր։ Ռոբետ Քոչարյանը թույլ չտվեց, որ մեր ընդդիմադիր գործընկերները բաց ճակատով գան ու իրենց հետաքրքրող հարցերն ուղղեն ցանկացած պաշտոնյայի. սա արդեն խոսում է, թե ինչ որակի ընդդիմություն մենք ունենք», - ասաց Անդրանիկ Քոչարյանը։

Աղբյուր` Փաստինֆո