Փաստ ինֆո

Երկրաշարժը զգացվել է Շիրակի մարզում՝ 6-7 բալ, Լոռու մարզում՝ 5-7 բալ, մի շարք մարզերում՝ Տավուշի, Արագածոտնի, Կոտայքի, Արմավիրի, Արարատի, Երևան քաղաքում՝ 5, 4, 3 բալ ուժգնությամբ։ Այս մասին հրավիրված մամուլի ասուլիսի ընթացքում ասաց «Սեյսմիկ պաշտպանության տարածքային ծառայության» տնօրեն Սոս Մարգարյանը՝ հավելելով, որ մասնագիտական խմբերը գտնվում են մարզերում՝ իրականացնելով մակրոսեյսմիկ հետազոտություններ, ինչի նպատակն է երկրաշարժի հնարավոր ազդեցությունների ուսումնասիրությունը։

Ինչ վերաբերում է փլուզումներին, Մարգարյանը նշեց, որ ըստ մամուլում հրապարակված լուսանկարների՝ Ալավերդի քաղաքում է քարաթափում եղել, բայց մակրոսեյսմիկ հետազոտության նպատակներից մեկը հենց դա է, որովհետև փլուզումները կարող են պայմանավորված լինել տարբեր պատճառներով։ Օրինակ՝ շատ հին որևէ կառույցից, եթե մի քանի քար է թափվում, դա դեռ չի նշանակում, որ փլուզում է։

«Մենք 8-րդ հարկում էինք, իմ ընտանիքի անդամների հետ գնացինք կանգնեցինք այնտեղ, որտեղ պետք է: Արդեն փորձիցս ասացի՝ հեռու երկրաշարժ է, որովհետև ճոճը երկար տատանվում էր»,- նշեց Մարգարյանը։

Անդրադառնալով հետցնցումներին՝ ԱԻՆ պաշտոնյան հայտնեց, որ արդեն կան հետցնցումներ, այս պահին ունենք 165 հետցնցում, որոնցից ամենաուժեղը 3 մագնիտուդով է։ Նրա դիտարկմամբ՝ հետցնցումային ակտիվությունը բնորոշ է նման երկրաշարժներին, հավանական է, որ այս երկրաշարժի հետցնցումները մի փոքր ավելի երկար տևեն։

Աղբյուր` Փաստինֆո