Փաստ ինֆո

Ռուս-ուկրաինական լարումը արհեստական օրակարգ է, որը փորձում են կյանքի կոչել ԱՄՆ-ն և ՆԱՏՕ-ի անդամ երկրները՝ հիմնավորելով, թե Ռուսաստանը պատրաստվում է ռազմական ագրեսիայի միջոցով գրավել Ուկրաինան: Այս արհեստական օրակարգով փորձ է արվում միջազգային հանրության մոտ տպավորություն ստեղծել առ այն, որ Ռուսաստանն ագրեսոր պետություն է և պատրաստվում է գրավել Ուկրաինան: «Փաստինֆո»-ի հետ զրույցում նման դիտարկում արեց ռազմական փորձագետ Հայկ Նահապետյանը:

Նրա արձանագրմամբ՝ այս քարոզչական հնարքն օգտագործելով ԱՄՆ-ն տնտեսական խնդիր է լուծում, մասնավորապես, ԱՄՆ-ը ռուսական սպառնալիքը որպես դրոշ է սարքում եվրոպական դաշտում՝ նպատակ ունենալով վախեցնել եվրոպական երկրներին և ստիպել, որ նրանք Ռուսաստանի հետ տնտեսական հարաբերությունները վերացնեն:

Ըստ Հայկ Նահապետյանի՝ ռուս-ուկրաինական հակամարտությունը Արևմուտքի, մասնավորապես՝ ԱՄՆ-ի կողմից ստեղծված կեղծ օրակարգ է, իսկ իրական օրակարգը այն է, որ այդպիսով ԱՄՆ-ն փորձում է խուսափել իր պարտավարությունները կատարելուց.

«2021թ-ի դեկտեմբերի 15-ին ՌԴ ԱԳՆ-ն ԱՄՆ պետքարտուղարություն ներկայացրեց երկու փաստաթուղթ՝ անվտանգության երաշխիքների վերաբերյալ:

Իսկ իրականում ՌԴ-ն շատ հստակ ԱՄՆ-ին և ՆԱՏՕ-ի անդամ երկրներին ասում է, որ ՆԱՏՕ-ի՝ դեպի Արևելք ծավալման սպառնալիքները Ռուսաստանի համար այնքան են մեծացել, որ Ռուսաստանը չի հանդուրժի և թույլ չի տա, որ այդ ընդլայնումը շարունակվի, մասնավորապես՝ Լեհաստանում և Ռումինիայում հարվածային- հրթիռային համակարգերի տեղադրումը ուղղակիորեն վտանգում է Ռուսաստանի կարևորագույն քաղաքների, մասնավորապես ՝մայրաքաղաքի անվտանգությունը: ՌԴ-ն ՆԱՏՕ անդամ երկրներին հորդորում է մնալ այն պայմանավորվածությունների շրջանակում, ըստ որի, ՆԱՏՕ-ն չպետք է ընդարձակվի դեպի Արևելք՝ դեպի Ռուսաստանի սահմաններ, այնինչ ՆԱՏՕ-ն իր խոստումը չի պահել և շարունակվում է ընդարձակվել: ՌԴ-ն ԱՄՆ-ի և ՆԱՏՕ-ի անդամ մյուս երկրների հետ այդ երկու փաստաթղթերի միջոցով խոսեց վերջնագրի լեզվով »,-ասաց փորձագետը և մանրամասնեց՝ ռուս-ուկրաինական կեղծ հակամարտությունն օրակարգ բերելը բուն նպատակը այս երկու փաստաթղթերի մեջ նշված կարևորագույն կետերի կատարման անհրաժեշտությունից է բխում, իսկ կետերի մեջ նաև նշվում է, որ, մասնավորապես Արևելյան Եվրոպայի երկրներում ՆԱՏՕ-ն պետք է բազաներ չունենա.

«ԱՄՆ-ն փորձում է անընդհատ այս երկու փաստաթղթերը բերել ռուս-ուկրաինական հարաբերությունների տիրույթ, որովհետև չի ցանկանում կատարել այդ փաստաթղթերի միջև նշված կետերը:

Այն քարոզչական աղմուկը, որը բարձրացվում է, թե, իբր, Ռուսաստանը պատրաստվում է հարձակվել Ուկրաինայի վրա, իրականությունից հեռու է, չեմ բացառում, որ Ուկրաինայի զինված ուժերը, ԱՄՆ-ի և Մեծ Բրիտանիայի ռազմաքաղաքական ղեկավարության դրդմամբ, գործողություններ սկսեն Դոնեցկի և Լուգանսկի ինքնապաշտպանական ուժերի նկատմամբ, բայց սա կարող է ճակատագրական լինել Ուկրաինայի ղեկավարության համար, Ուկրաինայի ղեկավարությունը այս ամենը շատ լավ հասկանում է »,-ասաց նա:

Հայկ Նահապետյանը նաև ընդգծեց, որ տեղի ունեցող արտաքին գործընթացները իրենց ուղղակի ազդեցությունն են ունենալու Հայաստանի վրա:

Ըստ փորձագետի՝ Հայաստանը ճիշտ գործելու դեպքում կարող է շահած դուրս գալ այս իրավիճակից․ «Աշխարհաքաղաքական այս տեկտոնիկ փոփոխություններում գործընթացների շոգեքարշը Հայաստանի ռազմավարական դաշնակից հանդիսացող Ռուսաստանն է:

Տեսականորեն ընդունենք, որ Ռուսաստանը հասնելու է այն նպատակներին, որ միասին դեկտեմբերի 15-ի հայտնի փաստաթղթերում արձանագրել է, սա նշանակում է, որ մեր ռազմավարական դաշնակիցն այս լուրջ բախման ժամանակ հաղթող է դուրս գալու, իսկ Հայաստանը կարող է շահած դուրս գալ հաղթող ռազմավարական դաշնակցի սերտ համագործակցությամբ՝ հաշվի առնելով, որ Ադրբեջանը էյֆորիայի մեջ է, նրանք ցանկանում են Թուրքիայի հետ ստեղծել իրենց մտացածին թուրանական պետությունը, իսկ սա ուղղակիորեն Ռուսաստանի շահերի հետ հակասության մեջ է մտնում, ինչը նշանակում է, որ Ռուսաստանը օգտագործելու է իր ձեռքի տակ եղած ողջ գործիքակազմը և Ադրբեջանի նկատմամբ իրականացնելու է ճնշումների քաղաքականություն, որպեսզի Ադրբեջանը հետ կանգնի, իսկ Ադրբեջանի սխալ ընթացքն իր համար կորստաբեր կարող է լինել: Սա ուղղակիորեն կարող է առնչվել նաև Արցախի հարցի հետ»,-պարզաբանեց փորձագետը:

Աղբյուր` Փաստինֆո