Փաստ ինֆո

Քաղաքագետ Ռուբեն Հակոբյանի նկատմամբ քրեական գործ է հարուցվել խորհրդարանական լսումների ժամանակ ունեցած ելույթի համար։
Նրա փոխանցմամբ՝ ինքը նախ ոստիկանություն էր հրավիրվել մոտ երկու ամիս առաջ՝ նոյեմբերի 25-ի խորհրդարանական լսումների ժամանակ հնչեցրած գնահատականների համար ու կարծում էր, որ դրանով իշխանությունները սահմանափակվել են։ Սակայն պարզում է քրեական գործ է հարուցել և այսօր հրավիրվել էր ՔԿ՝ վկա- կասկածյալի կարգավիճակով հարցաքննության։ Հակոբյանը նշել է, որ, օգտվելով իր իրավունքից, ցուցմունք չի տվել, ուղղակի պնդել է իր գնահատականները, նշելով, որ այն, ինչ ասել է ժամանակին՝ ուժի մեջ է։

«Այսօր կարծես ճակատագրի հեգնանք լինի՝ նա, ով այսօր կենտրոնացրել է դատական իշխանությունն իր ձեռքում դա Գագիկ Ջհանգիրյանն է, 1995-ին կարողացավ դատական համակարգը ոչնչացնել, կարողացավ սղոցել պետության համակարգը, ընտրությունը որպես երեւույթ, վերացնել: Այդ ժամանակ պայքարեցի, արդյունքում, իհարկե, հայտնվեցի ԱԱԾ մեկուսարանում: Այն ժամանակ, իհարկե, ավելի ծանր հոդվածներ էին, 4 հոդվածներից երկուսը մահապատժի հոդվածներ էին: Այդ մարդը պետությունը ոչնչացրեց ու չպատժվեց: Չպատժվեց նաեւ, երբ 1999 թվականի հոկտեմբերի 27-ին, իր ընկերոջ՝ Վազգեն Սարգսյանի մարմինը դեռ տաք էր, պահանջում էր, որ իրեն գլխավոր դատախազ նշանակեն: Չնշանակվեց, հետո փորձեց այդ նենգ խմբի հետ հեղաշրջում իրականացնել ու էլի չպատժվեց: Այսինքն՝ չի պատժվել ու հիմա ռևանշ է անում: Հիմա էլ ասում է՝ ես եկել եմ իշխանության, թքած ունեմ, թե ինչ է կատարվում»,- ՔԿ-ից դուրս գալուց հետո հայտարարել է Ռ. Հակոբյանն ու ավելացրել.-«Ես արհամարհում եմ գագիկջհանգիրյանական արդարադատությունը: 1996-ին իմ վախը բռնել են: Եթե փորձում են ահաբեկել, իզուր: Իրենք այս անգամ անպատիժ չեն մնա, որովհետև ոչնչացնում են պետությունը»:

Փաստաբան Վարազդատ Հարությունյանը նշեց, որ քրեական գործը հարուցվել է ՀՀ քրեական օրենսգրքի 137.1 հոդվածի 2-րդ մասի 2-րդ կետով (Ծանր վիրավորանք հասցնելը կամ անձի վերաբերյալ ծանր վիրավորանք պարունակող նյութեր տարածելը, որը կատարվել է անձի հանրային գործունեությամբ պայմանավորված)։ Նրա խոսքով` իր պաշտպանյալը նաև գրավոր հայտարարություն է արել` նշելով, որ այս ամենը որակում է որպես քաղաքական հետապնդում։

Հիշեցնենք, որ 2021թ. նոյեմբերի 25-ին ԱԺ նիստերի դահլիճում տեղի են ունեցել խորհրդարանական լսումներ` «Սահմանագծման եւ սահմանազատման հիմնախնդիրներ» թեմայով ԱԺ հայտարարության նախագծի վերաբերյալ, որին հրավիրված են եղել տարբեր քաղաքական գործիչներ, փորձագետներ։ Իսկ այսօր պարզ է դառնում, որ ԱԺ ամբիոնից հնչեցրած գնահատականների, քննադատությունների համար քրեական գործեր են հարուցվում հենց գործիչների նկատմամբ։

Աղբյուր` Փաստինֆո