Փաստ ինֆո

Նիկոլապետության օրոք պատերազմի արդար քննություն չի կարող լինել, միայն այս իշխանության հեռանալուց հետո կարելի է հուսալ 44-օրյա պատերազմի օբյեկտիվ քննություն:«Փաստինֆո»-ի հետ զրույցում ասաց ռազմական փորձագետ Կարեն Վրթանեսյանը:

Երեկ արդեն պաշտոնապես հայտարարվեց, որ խորհրդարանում 44-օրյա պատերազմի հանգամանքներն ուսումնասիրող քննիչ հանձնաժողով է ստեղծվել՝ իշխող «Քաղաքացիական պայմանագիր» խմբակցության պատգամավորների նախաձեռնությամբ:

Ըստ ԱԺ կանոնակարգի՝ քննիչ հանձնաժողովը ղեկավարելու է Պաշտպանության և անվտանգության հարցերի մշտական հանձնաժողովի ղեկավար Անդրանիկ Քոչարյանը:

Ընդդիմադիր «Հայաստան» և «Պատիվ ունեմ» խմբակցություններն արդեն հայտարարել են, որ չեն մասնակցելու 44-օրյա պատերազմի հանգամանքները քննող հանձնաժողովի աշխատանքներին, քանի որ «չեն ուզում մասնակցել իշխանությունների «անմեղության բեմադրմանը»:

Փոխարենը իշխանությունը չի թաքցնում իր մեծ ցանկությունը՝ հանձնաժողովի կազմում տեսնել իր սատելիտ արտախորհրդարանական ուժերին:

Ռազմական փորձագետ Կարեն Վրթանեսյանը մեզ հետ զրույցում վստահեցրեց, որ քննիչ հանձնաժողովը գործիք է դառնալու իշխանության համար՝ իրենց իսկ մեղքը մաքրելու, նոր մեղավորներ նշանակելու համար, ինչպես նաև դառնալու է շանտաժի գործիք՝ գեներալիտետի հանդեպ:.

«Քանի դեռ իշխանության է այն ուժը, որն իմ խորին համոզմամբ համար մեկ մեղավորն է պարտության, որևէ օբյեկտիվ քննություն մասին խոսք չի կարող լինել: Ինչպես ապրիլյան քառօրյա մարտերի քննման հանձնաժողովում, այնպես էլ այս հանձնաժողովն օգտագործվելու է որպես գործիք՝ իշխանության համար անցանկալի մարդկանց վրա քաղաքական և իրավական ճնշումներ գործադրելու համար՝մասնավորապես՝ զինվորականության մեջ, այլ պարագայում այդքան չէր ձգվի այս հարցը: Ամեն ինչ արվելու է, որպեսզի մեղքը բարդվի ինչ-որ մարդկանց վրա, որոնք իշխանության համար անցանկալի են, սա նաև շատ հարմար գործիք է դառնալու իշխանության համար՝ հլու-հնազանդ պահելու առանց այն էլ ջախջախված բանակի ղեկավար համակարգը»,-ասաց Վրթանեսյանը։

Իսկ թե ճիշտ է համարում ընդդիմության՝ հանձնաժողովի աշխատանքներին չմասնակցելու որոշումը, փորձագետն ասաց.

«Ընդդիմության չմասնակցելը, ենթադրում եմ, պայմանավորված է այն հանգամանքով, որ չլեգիտիմացնեն այդ հանձնաժողովի քայլերը, այս դեպքում տրամաբանական է ընդդիմության արածը »:

Ինչ վերաբերվում է արտախորհրդարանական տարբեր ուժերի ներգրավմանը հանձնաժողովի աշխատանքներին՝ Կարեն Վրթանեսյանը պատասխանեց.

«Նշյալ արտախորհրդարանական ուժերն այն ուժերն էին, որոնք ընտրությունների ժամանակ կատարում էին իշխանության պատվերը՝ ընդդիմադիր ուժերի ձայները փոշիացնելու մասով, նրանց իշխանությունները պահում են պահեստայինների նստարանին, որպեսզի ինչ-որ պահից նորից սկսեն խաղացնել դաշտում»,-ասաց փորձագետը:

Աղբյուր` Փաստինֆո