Փաստ ինֆո

Մեր երկիրը  հաստատուն քայլերով գնում է դեպի բռնապետություն,-խորհրդարանական ճեպազրույցների ընթացքում ասաց «Հայաստան» խմբակցության պատգամավոր, «Վերածնվող Հայաստան» կուսակցության հիմնադիր Վահե Հակոբյանը՝ հավելելով, որ դատավորի կալանավորումը վերջին մեխն էր այն դագաղի վրա, որ այսօր մենք անվանում ենք դատական համակարգ և արդարադատություն։ 

«Այս ֆոնին շարունակական լռություն են պահպանում եվրոպական կառույցները։ Սա, կամա թե ակամա, մեզ բերում է որոշ եզրակացությունների, որ այսօր Հայաստանի կառավարությունը ու Եվրամիության կառույցները մտել են  մի փուլ, որը կոչվում է  քաղաքական առևտուր։ Մեզ շատ  հետաքրքիր է ԵՄ կառույցների  լռության գինը, ի՞նչ են նրանց խոստացել Կառավարության ներկայացուցիչներն ու Նիկոլ Փաշինյանը»,-ասաց Հակոբյանը։

«Հայաստան» խմբակցության պատգամավոր Լիլիթ Գալստյանը շարունակելով գործընկերոջ խոսքը՝ նշեց, որ ՀՀ-ն ապրում է խորացող բռնաճնշումների, մենիշխանության, ավտորիտար ռեժիմի խորացման միջավայրում, որտեղ մարդու իրավունքների, իշխանության ճյուղերի տարբերական մասին խոսելն ավելորդ է։ 

«Այն օրենսդրական նախաձեռնությունների մեծամասնությունը, որ հայտնվում է խորհրդարանում, ևս ուղղված են ՀՀ-ում մեկ կետից կառավարվող և իշխանությունների քաղաքական քիմքն ու ճաշակը բավարարող միջավայրի ստեղծմանը»,-ասաց ընդդիմադիր պատգամավորը՝ նշելով, թե «Հայաստան» խմբակցության տարբեր պատգամավորներ խոշտանգման են ենթարկվում։

Գալստյանի խոսքով՝ ամբողջ հանրապետությունը թաղված է բռնատիրության մեջ և մենք հիմա գործ ունենք ոչ սահմանադրական երկիր հանդիսանող Հայաստանի հետ։ 

Աղբյուր` Փաստինֆո