Փաստ ինֆո

ԵՄ-ն վերջերս շատ վատ քաղաքականություն է իրականացնում Հայաստանում:

Այստեղ դեսպաններ է նշանակում մարդկանց, հետո նրանց թոշակի է ուղարկում, ո՛չ նախորդ դեսպանն էր մի բան, ոչ էլ այս դեսպանը: Հայաստանում ԵՄ ներկայացուցչության շենքի մոտ բողոքի ակցիայի ժամանակ նման հայտարարությամբ հանդես եկավ ՀՀԿ փոխնախագահ Արմեն Աշոտյանը:

Վերջինս կոչով դիմեց ԵՄ գործընկերներին և հորդորեց դադարել Հայաստանում գործի նշանակել դիվանագիտական  «անորակ կադրերի», որոնք, փոխանակ ներկայացնեն եվրոպական արժեքներըև նպաստեն Հայաստանի ժողովրդավարությանը, ընդհակառակը՝ քայքայում են այդ ամենը՝ դառնալով գործող վարչակազմի սպասարկուները.

«Տիկին դեսպան, դուք անհայրենիք սրիկաների բերանը լեզու եք դնում, որ նրանցից մեկը ԱԺ ամբիոնից հանդգնում է հայտարարել, որ Հայաստանի բրենդը ժողովրդավարությունն է։ Ոչ, սիրելի հայրենակիցներ, ցավով ու կսկիծով ասեմ՝ 2021 թվականի հունիսից հետո Հայաստանի բրենդը աշխարհում նվաստացումն է, անարգանքն է, արժանապատվությունից զրկումն է ու տիկին դեսպանը մեր երկրում սպասարկում է բացառապես կապիտուլյանտ իշխանությունների շահերը», - ասաց ՀՀԿ փոխնախագահը՝ դիմելով Հաայստանում ԵՄ դեսպան Անդրեա Վիկտորինին:

ՀՀԿ փոխնախագահը ԵՄ դեսպանին կոչ արեց՝ «Go home»:

«Տիկին դեսպան, դուք չեք փոխվելու, դուք Հայաստանում անելիք չունեք, Հայաստանը կարիք ունի նոր դեսպանիմ որն աչքի չի փակի աղաղակող խայտառակությունների վրա», - ասաց Արմեն Աշոտյանը։

Հիշեցնենք, որ մի խումբ իրավապաշտպաններ, ընդդիմադիր պատգամավորներ և քաղաքական գործիչներ բողոքի ակցիա են իրականացնում Հայաստանում ԵՄ ներկայացուցչության շենքի մոտ՝ընդդեմ դատական համակարգի նկատմամբ իրականաղվող բռնաճնշումների և այդ ֆոնին ԵՄ անգործության։ Հավաքը հրավիրել է Ռուբեն Մելիքյանը՝ Սյունիքի մարզի ընդհանուր իրավասության դատարանի դատավոր Բորիս Բախշիյանի կալանավորումից հետո։

Աղբյուր` Փաստինֆո