Փաստ ինֆո

Հայաստանի օրակարգում Միութենական պետությանը միանալու հարց չկա։ Իմ դիրքորոշումն այն է, որ Հայաստանը սուբերեն, ժողովրդավար պետություն է և պետք է շարունակի մնալ այդպիսին։ Այս մասին լրագրոների հետ զրույցում ասաց ԱԽ քարտուղար Արմեն Գրիգորյանը։ 

Անդրադառնալով պաշտոնական Բաքվի հայտարարություններին, թե Հայաստանը դելիմիտացիայի և դեմարկացիայի գործընթացը սկսելու համար նախապայմաններ է առաջ քաշել՝ Գրիգորյանը հայտնեց, որ Հայաստանը երբեք նախապայմաններ առաջ չի քաշել։

«Հայաստանը պարզապես պահանջել է, որ բոլոր պայմանավորվածությունները, որոնք եղել են Սոչիում անցած տարի՝ նոյեմբերի 26-ին, կատարվեն։ Այդ հայտարարության մեջ նշված է, որ անվտանգության բարձրացման շուրջ քայլեր պետք է ձեռնարկել, այնուհետև սկսել դելիմիտացայի, դեմարկացիայի գործընթացը։ Հայաստանը ցանկանում է, որ այդ պայմանավորվածությունն իրագործվի։ Բացի դրանից, երբ Հայաստանի և Ադրբեջանի զինված ուժերը շատ մոտ են կանգնած իրար, ցանկացած քաղաքական գործընթաց կարող է ազդել, և սրացումներ լինեն։ Հայաստանն առաջարկում է, որ զորքերը հայելային հետ քաշվեն, այնտեղ տեղակայվեն սահմանապահ զորքեր, որպեսզի կարողանանք գործընթացը հանգիստ անցնել։ Այստեղ չի կարող որևէ նախապայմանի ընկալում նույնիսկ լինել»,- հայտարարեց նա։

Ինչ վերաբերում է հարցին, թե «Թուրքիա-Ադրբեջան մեկ ազգ, մեկ բանակ» կարգախոսի վերաբերյալ ինչու պաշտոնական արձագանք չեղավ՝ Գրիգորյանը նշեց, թե. «Մենք պարբերաբար մեր շուրջը ստեղծված անվտանգային միջավայրը գնահատում ենք և դրա հետ կապված քայլեր ենք կատարում, դրանց մի մասը կարող է լինել հրապարակային, մի մասը՝ ոչ հրապարակային, բայց ցանկացած գործընթաց, որոնք տարածաշրևջանում տեղի են ունենում և անհրաժեշտության դեպքում արձագանքում ենք սըեղծված իրավիճակին»։

Աղբյուր` Փաստինֆո