Փաստ ինֆո

2020 թվականի 44 -օրյա պատերազմի հետեւանքով ունենք 3812 զոհ։ Այս մասին ԱԺ ամբիոնից հայտարարել է ՀՀ վարչապետ Նիկոլ Փաշինյանը՝ նշելով, որ զոհերից 3736-ը զինծառայող է, 76-ը՝ քաղաքացիական անձ։

Հրապարակելով այսօրվա դրությամբ տվյալները՝ Ն. Փաշինյանը նշել է, որ այս պահի դրությամբ 217 մարդու գտնվելու վայրը անհայտ է, որոնցից 196-ը զինծառայող է, իսկ 21-ը քաղաքացիական անձ։

Փաշինյանը միաժամանակ չկարողացավ հայտնել, թե որքան է եղել ապրիլյան պատերազմի զոհերի թիվը։

Հարցը բարձրացրել էր ԱԺ «Պատիվ ունեմ» խմբակցության պատգամավոր Հայկ Մամիջանյանն այսօր՝ փետրվարի 9-ին, ԱԺ-ում կառավարության հետ հարցուպատասխանի ժամանակ դիմելով Նիկոլ Փաշինյանին։ 

Փաշինյանն ասաց, որ այս պահին չի կարող անգիր հիշել։ Բայց բողոքեց, որ ընդդիմադիր գործիչները 44 օրյա պատերազմի վերաբերյալ տարբեր տվյալներ են հրապարակում։

Հայկ Մամիջանյանն արձագանքեց. «Տրամաբանությունը կայանում է  հետևյալում. 2016  թվականի հաղթանակից հետո տևական ժամանակ շատ ու շատ լրատվամիջոցներ, որոնցում այն ժամանակ աշխատում էին  ձեր քաղաքական թիմի որոշ ներկայացուցիչներ, ձեր քաղաքական թիմի որոշ ներկայացուցիչներ անդադար արծարծում էին Քառօրյայի ընթացքում հարյուրից ավելի զոհերի թիվը։ Վերջին աղետալի պատերազմի հետ կապված  չպարզված հանգամանքներ դեռ ունենք,  բայց Ապրիլյանի պարագայում այդ թիվը հստակ էր։ Ցանկալի կլինի, որ նաև մեր գործընկերները,  որոնք այս ընթացքում նույնպես օգտագործում են տվյալ, որը փաստական որևէ հիմք չունի և  մանիպուլյատիվ է, այլևս նման կերպ չվարվեն Ապրիլյան քառօրյա պատերազմի զոհերի թվի վերաբերյալ»։

Նիկոլ Փաշինյանն ասաց, որ դիտարկումը ճիշտ է  համարում. «Բայց ուզում եմ ասել, որ ընդամենը օրեր առաջ  ձեր կուսակցության ղեկավար Սերժ Սարգսյանն իր հարցազրույցում ասում էր 5000 զոհ։  Որտեղի՞ց  այդ տվյալը: Դրանից առաջ էլ է եղել, իր ընտանիքի մի ուրիշ անդամ 7000 թիվ է հրապարակել եւ այդ թիվը դրվել է շրջանառության մեջ ու մինչեւ հիմա կրկնում են: Տվյալ ունեն՝ թող հրապարակեն»։

Աղբյուր` Փաստինֆո