Փաստ ինֆո

Խորհրդարանն այսօր երկրորդ ընթերցմամբ քննարկեց կառավարության ներկայացրած «Հանրակրթության մասին» օրենքում փոփոխություններ և լրացումներ կատարելու մասին օրենքի նախագիծը: 

Նախագծով սահմանվում է, որ դպրոցները կունենան նաև վարչատնտեսական մասի համակարգող: Սահմանվում է նաև, որ ուսումնական հաստատության ընթացիկ գործունեության ղեկավարումն իրականացնում է ուսումնական հաստատության գործադիր մարմինը` ուսումնադաստիարակչական մասով՝ ուսումնական մասի տնօրենը եւ վարչատնտեսական մասով` վարչատնտեսական մասի համակարգողը: Ամրագրվել է, որ պետական ուսումնական հաստատությունում վարչատնտեսական գործընթացի կառավարումն իրականացնում է ուսումնական հաստատության համակարգողը կամ լիազոր մարմնի կողմից պատվիրակված իրավաբանական անձը՝ օրենսդրությամբ սահմանված կարգով:

ԱԺ-ում նախագիծը ներկայացնելիս ԿԳՄՍՆ փոխնախարար Ժաննա Անդրեասյանը նշեց, որ նախագծով հստակեցրել են տնօրենի և համակարգողի գործառույթները՝ հստակ թվարկելով դրանք.

«Հստակեցրել ենք նաև վարչատնտեսական կառավարումը իրավաբանական անձին պատվիրակելու հնարավորությունը: Համակարգողի համար սահմանել ենք պարտավորություն՝ ամեն տարի խորհրդին ներկայացնել կատարված աշխատանքները»,-ասաց Անդրեասյանը:

Առաջինից երկրորդ ընթերցմամբ քննարկմանը նախագծում ներառվել է դրույթ, որով նախատեսվել է, որ կամավոր ատեստավորման արդյունքում համապատասխան արդյունք ցուցաբերած ուսուցիչների դրույքաչափը կփոխվի, որի վրա կկիրառվի նաև 5 տարվա հավելավճարը: «Էապես հեշտացրել ենք նաև տարակարգի կարգավորման դրույթները, ինչը մեզ հնարավորություն պետք է տա հասնել ուսուցչի վարձատրության էական բարձրացմանը: Քննարկվում է ուսուցչի դրույքաչափն ատեստավորման արդյունքում 200 հազար դրամ դարձնելու հնարավորությունը, որն էլ համակցվելով երկու գործիքների առավելագույն հավելավճարների հետ, կարող է հասնել մինչև 400 հազար դրամի»,- ասաց փոխնախարարը:

Հստակեցվել է, թե որ դեպքում վարչական աշխատողները դպրոցում կարող են դասավանդել:

Տնօրենին անվստահություն հայտնելու մասով հստակեցվել է, որ պետք է հիմք ընդունվի լիազոր մարմնի սահմանած կատարողական ցուցանիշների կատարման եզրակացությունը: Հստակեցվել են որակավորման պահանջները տնօրենի համար, որտեղ մանկավարժի որակավորումը փոխարինվել է կրթության ոլորտի բարձրագույն կրթությամբ: Ուժի մեջ մտնելու ժամկետ է սահմանվել 2026 թվականը:

Հստակեցվել են նաև որակավորման պահանջները համակարգողի համար՝ համապատասխանեցնելով կոռուպցիայի կանխարգելման հանձնաժողովի անդամի որակավորման պահանջներին:

Ֆիքսվել է, որ դպրոցի տնօրեն կամ համակարգող չի կարող առաջադրվել կամ լինել այն անձը, որը հանդիսանում է կուսակցության և նրա տարածքային ստորաբաժանումների ղեկավար և վերսհսկողություն իրականացնող մարմինների անդամ:

ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի դրական եզրակացությունը ներկայացրել է հանձնաժողովի նախագահ Սիսակ Գաբրիելյանը: Նրա խոսքով՝ առաջին ընթերցմամբ ընդունվելուց հետո պատգամավորները նախագծի վերաբերյալ ներկայացրել են առաջարկներ, որոնց մեծ մասն ամբողջությամբ կամ մասնակիորեն ընդունվել է:

Աղբյուր` Փաստինֆո