Փաստ ինֆո

Գերությունից վերադարձած տղաները ո՛չ հոգեպես, ո՛չ էլ ֆիզիկապես պատրաստ չեն ծառայությունը շարունակելու, նրանց որոշակի ժամանակ է պետք՝ վերականգնվելու համար: Չի կարող Ադրբեջանի բանտից նոր վերադարձած հայ զինվորը 8 ժամ ԱԱԾ-ում հարցաքննվելուց հետո շարունակել ծառայությունը, այդպիսի ռեմբոներ չեն լինում:

Նրանք մարդիկ են, որոնք ունեն էմոցիաներ, և, բնականաբար, ունեն վերականգնողական կուրսեր անցնելու անհրաժեշտություն: «Փաստինֆո»-ի հետ զրույցում հայտարարեց ԱԺ նախկին պատգամավոր Նաիրա Զոհրաբյանը:

Նշենք, որ ՀՀ քննչական կոմիտեից «Փաստինֆո»-ին հայտնել են , որ փետրվարի 7-ին հայրենիք վերադարձած 8 գերիներից 6-ը վերադարձել են իրենց ընտանիքներ, իսկ 2 ժամկետային զինծառայողներ տեղափոխվել են ռազմական ոստիկանություն՝ հետագա ծառայությունը շարունակելու համար:

Մեզ հետ զրույցում Նաիրա Զոհրաբյանն անթույլատրելի համարեց, որ Բաքվի բանտից նոր վերադարձած հայ զինվորին ուղարկեն ծառայությունը շարունակելու, վերադարձած գերիները պետք է անցնեն վերականգնողական երկարատև շրջան, նրանց հետ պետք է աշխատեն հատուկ մասնագետներ, և նոր միայն շարունակեն իրենց ծառայությունը.

«Ես այս հարցի մասին բազմիցս բարձրաձայնել եմ: Երբ գերիները վերադառնում էին հայրենիք, նրանց, որոնց զինակոչը դեռևս չէր ավարտվել, շատ կարճ վերականգնողական թերապիայից հետո նորից զորակոչում էին ծառայությունը շարունակելու: Երբ այս խնդիրը բարձրացրի՝ նշելով, որ տղաները հոգեբանորեն պատրաստ չեն ծառայությունը շարունակելու, ՊՆ-ն հղում էր տալիս օրենսդրությանը և ասում, որ օրենսդրությունը նման բան չի նախատեսում: Շատ դեպքեր են եղել, երբ Ադրբեջանից վերադարձված ռազմագերիններին, ովքեր ենթարկվել էին ֆիզիկական և հոգեբանական կտտանքների, վերականգնողական կարճ թերապիա անցնելուց հետո ուղարկել են կրկին ծառայությունը շարունակելու: Նրանցից շատերն ունեին ֆիզիկական և հոգեբանական լուրջ խնդիրներ, նրանց հետ պետք է աշխատեին սոցիոլոգները, հոգեբանները:

Սակայն այդ ժամանակ ինձ առաջարկեցին, որ օրենքում փոփոխություն առաջարկեմ, և եթե օրենքը թույլ տա, իրենք նոր կարող են որոշ ժամկետով հետաձգել ծառայությունը»,-ասաց Զոհրաբյանը և նկատեց, որ ՊՆ-ն օգտվում է օրենքի բացից և գերությունից վերադարձած տղաներին տարկետում չի տրամադրում.

«Սա սխալ է, որքան էլ տղաները փորձեն տոկուն երևալ և իրենց հարազատներին ցավ չպատճառելու համար ասեն, որ Բաքվում իրենց լավ են վերաբերվել, բայց մենք գիտենք, որ իրականությունն այլ է, նրանց տևական ժամանակ ռեաբիլիտացիա է պետք, բայց քանի որ օրենքը թույլ չի տալիս, ՊՆ-ն էլ օգտվում է բացառապես օրենքի լծակից »,-ասաց նա:

ԱԺ նախկին պատգամավորը նաև շեշտեց՝անհրաժեշտ է ստեղծել նաև հոգեբանների, սոցիոլոգների և հոգեթերապեվտների խումբ, որոնք կաշխատեն գերությունից վերադարձած զինվորների, ինչպես նաև պատերազմում հաշմանդամ դարձած զինվորների հետ.

«Նրանք այսօր սոցիումին ինտեգրվելու լրջագույն խնդիրներ ունեն, քան որ այն սթրեսը, նվաստացումները, որոնք իրենք կրում են անազատության մեջ, այն էլ Ադրբեջանի նման հանցագործ բանտերում, անբացատրելի է »,-ասաց ԱԺ նախկին պատգամավորը:

Իսկ թե առհասարակ ինչպե՞ս է վերաբերվում այն երևույթին, որ գերությունից նոր վերադարձած զինվորներին անմիջապես տանում են հարցաքննության, նրանց նկատմամբ գործեր են հարուցվում, Նաիրա Զոհրաբյանը նկատեց՝ այստեղ երկկողմանի է խնդիրը:

Ըստ նրա՝ որոշակի հանգամանքներ կան, որոնք պետությունը պետք է պարզի.

«Օրինակ, ինչպես է եղել, որ 7 հոգով գերի են հանձնվել երկու ադրբեջանցու։ Ես չեմ ուզում խախտել որևէ մեկի անմեղության կանխավարկածը, բայց գտնում եմ, որ պետությունը պետք է կատարի իր պարտականությունը և պարզի գերեվարման բոլոր հանգամանքները »:

Զրուցակիցը միևնույն ժամանակ շեշտեց, որ այս ողջ գործընթացը պետք է արվի միայն վերականգնողական երկարատև փուլ անցնելուց հետո, պետք է զինվորներից ցուցմունք վերցնել հոգեկան հավասարակշիռ վիճակում, իսկ հոգեկան հավասարակշիռ վիճակում կարող են լինել միայն անհրաժեշտ ռեաբիլիտացիայից հետո։

«Նրանց նախ պետք է թողնեն, որպեսզի տուն գնան: Ծնողը ամիսներով սպասում է որդու վերադարձին, հետո էլ ստիպված է լինում 8 ժամ սպասել, որպեսզի որդուն հարցաքննեն, հետո էլ պարզ կդառնա ՝ որդուն կկալանավորե՞ն, թե՞ բաց կթողնեն:Այս ամենը գալիս է նրանից, որ չկա մշակված ինստիտուտ՝ ինչպե՞ս աշխատել ռազմագերիների հետ, այստեղ նաև լուրջ օրենսդրական փոփոխությունների կարիք կա, որը ծագել է նաև 44 օրյա պատերազմի հետևանքով: Նրանց հետ պետք է աշխատանքներ տարվեն, քանի որ բոլորը վերադառնում են հոգեբանական լուրջ խնդիրներով, այդ վիճակում կարող են անգամ ոչ ճիշտ ցուցմունքներ տալ, ինչպես հարցաքննված գերիներից մեկն էր պատմել՝ ինչ տվել են, արագ-արագ ստորագրել է, այսպես չի լինում, նրանց հոգեբանակն սթրեսի, աֆեկտի մեջ են, աֆեկտի մեջ կարող են ցանկացած ցուցմունք տալ, կարող են նրանց մտքերն անգամ ուղղորդել և ստանալ իրենց ուզած ցուցմունքը ստանալ »,-ասաց Նաիրա Զոհրաբյանը:

Աղբյուր` Փաստինֆո